كان ياما كان ياسادة ياكرام ولا يحلي الكلام إلا بذكر النبي عليه الصلاة والسلام كان في ولد صغير صحي الصبح من نومه حيران راح لمامته وسألها؛ هو احنا مين خلقنا ياماما؟! ردت ماما وقالت :ربنا سبحانه وتعالى
رد الولد وقال:وهو فين ربنا ؟ ردت ماما وقالتله : موجود معانا في كل مكان برحمته ولطفه وستره رد الولد وقال :طب ليه مش باشوفه؟! ردت ماما وقالت: ربنا شايفنا وسامعنا وبيعمل لنا كل اللي بنحتاجه قالها بردو ليه مش باشوفه ياماما انا نفسي اشوف ربنا ردت ماما وقالتله: ربنا سبحانه وتعالى بنحس بوجوده في كل حاجة حوالينا واحنا فعلا بنشوف ربنا في كل حاجة حلوه حوالينا بنشوفه في كل نعمه خلقها ربنا لينا بكل حاجه بتسهل أمورنا علينا. سكت الولد شويه واستأذن مامته يلعب مع اصحابه شويه وافقت ماما وقالت العب بس بلاش تتأخر أو تبعد طلع الولد وكان مشغول جدا بكلام مامته وبيبص للسما ويقول: ياربنا انا عايز اشوفك ماما قالتلي انك معانا فى كل مكان ازاي موجود وانا مش شايفك سمعه جدو الحكيم ونده عليه جدو قال ممكن اعرف انت عايش ازاي ؟! رد الولد وقال: بأكل وباشرب وباتعلم وبتنفس وأكبر رد جدو وقال بتتنفس ايه ؟! رد الولد باستغراب :حضرتك مش عارف انا بتنفس ايه ؟! بتنفس هوا طبعا رد جدو وقال : هو فين الهوا ؟ ومين اللي خلقه وازاي حاسس بيه ومش شايفه ؟! سكت الولد شويه وقال انا حاسس بالهوا وباشوفه بيهز الشجر والأوراق وباتنفسه رد جدو وقال : ولله المثل الأعلى ربنا سبحانه وتعالى هو نور على نور مكانه على عرش الرحمن فوق السبع سماوات لكنه معانا برحمته وستره ولطفه ونعمه ربنا معانا في كل مكان بصفاته العظيمه بيرزقنا وبيكبرنا وخلقنا في الدنيا عشان نعبده ونعمر الأرض ورزقنا القوة والصحة عشان نقدر ننفذ رسالته على الأرض احنا لازم نحمد ربنا على كل النعم اللي ربنا خلقها لينا لو جربنا نغمض عنينا مش هنشوف حاجة وهنحس بنعمة كبيره تعرف هيا ايه ؟! رد الولد وقال : نعمة النظر طب لو عملنا كده في أى نعمه ربنا خلقها لينا هنعرف أد ايه ربنا كريم وحنين وبيحبنا اوي واحنا لازم نحافظ ع الحب ده شكر الولد جدو ورجع بسرعه على مامته وحكالها على اللي حصل لأنه متعود مايخبيش أي حاجه خالص علي مامته وقاللها ياماما انا بحبك اوي وبحب ربنا اوي وكل يوم هاشكر ربنا على كل النعم الحلوة اللي خلقها لينا ربنا معانا وشايفنا وسامعنا في كل مكان وانا خلاص قررت مش هاعمل أي حاجه غلط تاني علشان ربنا مايزعلش مني وكل يوم هاقول الحمد لله على نعم ربنا علينا وتوته توته خلصت الحدوته واستنونا في حدوته جديدة مفيدة
متميزه دايما كعادتك يامامي شيمو ربنا مايحرمناش من حواديتك المميزه
ردحذفماما شوشو 😍🌙💛 دايما بتفرقي معانا كتير ف كل حاجه ف حياتنا 😍 ربنا يديم التوفيق يارب ويزيدك نجاح كمان وكمان
ردحذفالله بجد حدوتة جميلة وبترد على اكتر سؤال مش بنلاقي إجابة عليه للأولاد.. شكرا ماما شوشو 😍
ردحذفبالتوفيق والنجاح دوما 👍✌️منتظرين المزيد من الحواديت 😉😉😉💖❤️
ردحذفماشاء الله حدوته جميله و مفيده للاطفال ،بالتوفيق دائما🌷🌷
ردحذفماشاء الله حدوته جميله و مفيده للاطفال ،بالتوفيق دائما🌷🌷
ردحذفقصة جميلة جدا جدا جزاكى الله خيرا وبالتوفيق دائما يارب يا سيادة الاديبه شيماء ابو زيد
ردحذفتحفه ي مامي شوشو وانا شايفه ان هايجيلك انتقاد كتير عليها بس ولا تبالي لأن دائما خلف كل ناجح عواء ونبيح ولكن نحن نستمر في طريق النجاح
ردحذفماشاء الله جميلة ربنا يحفظ اولاظنا
ردحذفالله رحيم لطيف، الله بيده الأمر والتصريف، الله أعرف المعارف لا يحتاج إلى تعريف، لا إله إلا الله، ولا نعبد إلا إياه، ولا نرجو سواه، عظيم السّلطان والجاه، أفلح من دعاه، وسَعِدَ من رجاه، وفاز من تولاه، سبحان من خلق وهدى، ولم يخلق سُدى، عظم سلطانه، أرتفع ميزانه، وجمل إحسانه، وكثر أمتنانه.
جميلة جدا. وهو معكم اينما كنتم
ردحذف