اعرفكم بنفسي الاول انا رقيه ابراهيم مصممه عرايس فوم ورسامه
بورتريهات من الاسماعيليه دراستي كانت دبلوم صنايع قسم زخرفه بدايه شغلي من سنتين كنت بعمل انشطه مدرسيه للولاد وكانت كلها من الفوم
كنت بحب أجمع فوم واركنه عندي بحبه جدا بكل ألوانه سواء جليتر أو ساده وفي يوم جاتلي فكره اني اجمع عرايس بنتي المكسره واعملها اعاده تدوير بفساتين منفوشه كبيره عملتهم وكان بدايه موسم المولد النبوي اديت واحده منهم هديه لبنوته صاحبتي عجبتها جداا ونزلتها علي صفحتها عالفيس وعجبت صحابها جداا بدأت اعمل جروب وصفحه عالفيس وانزل صور العرايس وكمان بقيت بنزل فكل الجروبات المتخصصه باعمال الهاند ميد والفوم والحمد لله كان شغلي بيعجبهم جداا فرحت اوي بالتشجيع وقررت اشتغل فالعرايس دي عملت كميه والحمد لله اتباعت كلها فرحت جدا بالعائد المادي وتشجيع الناس ليه وانتظارهم لكل جديد بعمله لحد ما فيوم اتعرفت علي رئيسه لجنه المعارض فالاسماعيليه وعجبها شغلي جداا واقترحت عليا أن عشان ادخل معاها معرض بشغلي لازم العروسه كلها تكون هاند ميد يعني اصنع جسم العروسه بنفسي وكان تحدي بالنسبالي انا كنت بعشق الفوم وخلاص اتعودت عليه ومش عايزه اجرب خامه تانيه ومليش فالخياطه حاولت ادور عاليوتيوب علي فيديوهات لصناعه عرايس بالفوم والحمد لله لقيت اجانب كتير عامله فيديوهات طبعا لغتهم مش مفهومه بالنسبالي بقيت اخد اسكرين شوت للخامات وانزل الف فالمكتبات الكبيره وأحاول اعرف ده ايه ملقتش فالاسماعيليه حاجه نزلت القاهره والحمد لله جمعت الخامات واشتريتها وعملت شغل كتير ودخلت معاها معارض كتير تقريبا مفيش معرض مرحتوش معاها وكان حاجه جديده وخامه كل الناس شايفين أنه انجاز تطويعها بالشكل ده الصحافه كتبت عني وطلعت فبرامج كتير الحمد لله بعدها حسيت بمسؤليه كبيره ولازم اشتغل علي نفسي اكتر اخدت كورسات رسم واخدت كورس نحت وبقيت بدي كورسات اون لين حاليا والحمد لله شغلي بقا معروف لناس كتير وبإذن الله هفضل ورا حلمي لحد ما يكبر واحققه ومن خلال كتباتي هنا هعلمكم حجات كتير وهخليكم تحبو خامه الفوم زيي انتظروني كل اسبوع ومقال جديد عن صناعه العروسه الفوم وايه أهم الخامات المستخدمه سواء الوان أو لزق أو فوم وهنعرف ازاي بنطوع الفوم ده ونشكله لعروسه جميله ممكن نهادي بيها حد وممكن كمان تكون بدايه لمشروعك الفوم شغله كله مختص بالديكورات يعني عروسه تويلت حامله مناديل أو عروسه مطبخ أو قلم جميل يتحول لعروسه باي شخصيه كرتونيه يحبها الطفل ويكون معاه علي مكتبه أو مقلمه جميله حجات كتير جداا ممتعه فشغلها وبسيطه بس بتعمل ديكور جميل وجو حلو اوي مع الاطفال .
ربنا يوفقك ياحبى يارب وفنجاح دايما
ردحذف