الطلاق
الطلاق مابيخليش الست تحلو.
الطلاق مابيخليهاش تنور.
ان أسرة تتفك وبيت ينقصه فرد مش حاجة مبهجة.
ازاى حد ممكن ينور بعد مايفقد ونسه أو حتى شريكه في السكن.
الست بعد الطلاق ممكن تنجح..تاخد بالها من شكلها وجسمها..تعمل علاقات اكتر، لكن الوحدة اللى بتنيمها جنبها على مخدتها وتحضنها قبل ماتنام ماحدش بيشوفها في صورها المنورة.
والست لو احلوت ونورت بعد الطلاق ف ده مش عشان الطلاق جميل وهاتلنا منه باكو واتنين.
لكن عشان اكيد كانت ف علاقة مستنزفاها وأذياها شهور وسنين..كان لازم تخرج منها.
الست بتنور بعد الطلاق عشان هى أصلا ف الأصل ست منورة رجعلها نورها من تانى.
الطلاق مش اوبشن.
الطلاق ورقة أخيرة ربنا أحلها لما العشرة تستحيل والناس تبقى عايشة بتفقد كل يوم حتة من صحتها العقلية وسلامها النفسي.
بطلو تروجو للطلاق على أنه حدث جميل
وياللا ياستات اتطلقو وانطلقوا وهيييه شفته بقت قمر ازاى؟
الطلاق حدث جلل.. لازم نخاف منه..
من أول واحنا بنختار شريكنا لحد آخر محاولة عشان الحياة تستقيم.
الطلاق مش بيحلى
الحب هو اللى بيحلى.
العشرة الحلوة بتحلى.
الصحبة والونس هما اللى بيحلو.
ليست هناك تعليقات:
إرسال تعليق