لما تلاقي حبيبك
حبه ليك فجأة قل
ومبقاش يفتكرك
وبقى منك دايما يمل
يبقى تعيد حساباتك
و تحط نقطة
لما تعيش مع ناس
الحقد ماليهم
وقلوبهم نار وجاز
بتحرق كل إللي حواليهم
لازم تبعد عنهم فوراً
وكفاية كده عليهم
وتحط نقطة
ولما تشوف نفسك وسط الخير
بتتعلم كل مفيد حواليك
وفي شدتك بيقف معاك الغير
ومحدش بيبيعك والكل شاريك
يبقى تحط فاصلة وتكمل
طريقك إللي اخترته بايديك
ولما تكون في صحبة
تلاقي نفسك فيها
ومتفارقكش الضحكة
وتحب القعدة معاها
يبقى تكمل و تحط فاصلة
ولما يزورك الحزن
ويكون ضيف تقيل
وشيطانك شغال زن
والخير جواك بقى قليل
تبقى بعيد عن ربك
وهمك هيفضل كبير
يبقى لازم تحط نقطة
وتبدأ من أول وجديد
الحياة مليانة بالنقطة
وضروري يكون فيها فاصلة
وعشان في حياتك تكمل
لازم يكون عندك الحكمة
وهنفضل في حياتنا مكملين
مابين نقطة وفاصلة
ليست هناك تعليقات:
إرسال تعليق