حقك عليا يا بلدي
أنا اللى غلطان
كنت فاكر نفسي
جدع زي زمان
دلوقتي غصب عنى
بقيت ضعيف وجعان
قولى لي يابلدى
ليه الفقير فيكى
متهان
وليه رخيص فيكى
الإنسان
وليه الكلمه فيكى
صاحبها ورا القضبان
وليه زمامك
مش في إيدك
وليه يموت في البطن
وليدك
وليه السواد على جبينك
وليه الحق فيكى هربان
ألف ليه،و ليه
وكل ليه بألف سؤال
بقولهم مش عارف ليه
يمكن من غلبي..
وللا يمكن من خبتي
وللايمكن عشان فيكي
ضاعت هيبتي
وللا عشان زعلان
صدقينى يابلدى
واللهى ما بيدي
حيله،،
خايف اتقتل غيله،،،
وتضيع ورايا رجاله
وتفضل النسوان
أيوا خايف،،أيوا جبان
قليها من حقك
أنا مش زعلان
عشان هي دي الحقيقه
أنا السبب في الضيقه
خليتك محتاجه
لكل من كان
قادر ربك يعدلها
والميله يعدلها
وينصلح حلنا
ونرجع زي زمان
بس الموت يسبني
والجوع يرحمني
والظلمه تنجلي
والشمس تبان
حقك عليا يا بلدي
أنا اللى غلطان
سامحينى أبوس أيدك
أنا ماليش غيرك
حتى لو كنت غلطان
ليست هناك تعليقات:
إرسال تعليق