مشاكل الجواز في بيت العيلة
اولا احب اوجه رسالة لكل زوج بيسمعني دلوقتي بخصوص موضوعنا وهو الست اللي بتتجوز في بيت عيلة .
طبعا موضوع الجواز في بيت عيلة ده موضوع كبير جدا وليه سلبياته ومشاكله اللي مش بتنتهي .
مراتك مش سايبة بيت باباها عشان تيجي بيتك تخدمك انت واسرتك وكل قرايبك
و تكنس و تمسح و تغسل و شكراً علي كده!
هي سايبة حضنهم عشان تروح لحضن تاني يدفيها فوق دفا حضن اهلها.. 👌
سابت اهلها عشان تلاقي معاك السند و الحب و الاحتواء من حد ارتاحتله و حبته من قلبها.
وساعتها هتراعي مصالحك بعنيها من غير ما تطلب، هترضيك علي حساب راحتها من كتر حبها ليك.
مراتك متجوزتش عشان تصرف عليها و تبقي شايف نفسك كده قايم بدورك و زيادة !
مراتك كانت واكلة شاربة نايمة معززة مكرمة في بيت اهلها ... مكانتش مستنية الجواز عشان تعيش عيشة كريمة..
مراتك سابت كل ده عشان عايزاك.. شافت فيك الراجل اللي تتحامي فيه و تديله حبها من غير ما تخاف من حاجة..
الستات بتتجوز عشان تلاقي السكن و المودة و الرحمة و لو ملقتهمش مش هتتجوز و لو اتجوزت و ملقتهمش هتعيش تعيسة حتي لو عايشة في قصر !
في رجالة لما زوجاتهم يشتكوا يقولولك ما هي بتاكل
و بتشرب و عايشة حلو ! اعملها ايه تاني؟
انت لما بتأكلها و بتشربها فا ده حقها عليك مش فضل منك تذلها بيه كل شوية !
فكر انت بتديها ايه قبل ما تفكر انت بتاخد ايه !
مراتك مش جاية تعيش معاك بلقمتها!!!!!
مراتك ممكن تسيب عشانك شغلها أو حاجات كتير كانت متعودة تعملها و هي راضية عشان تبقي جنبك..
دورك تبقي اهلها.. وسندها.. وحبيبها
عشان هي لما سابت اهلها اتعشمت انك هتكون كده , وآمنت انك كل حاجة في دنيتها...
اي انسان لو عرف ازاي يحترم مراته.. وعرف ازاي يحتويها..ويحسسها بكيانها
والله كل انسان هيبقي سعيد مع مراته..ونسب الطلاق هتقل..
الواحده مش بتطلب الطلاق الا لما تلاقي حقها في الراجل اللي اختارته دون عن الناس ضايع.
الست محتاجه حب اهتمام..احتواء رومانسيه .. خد رايها اتكلم معاها ما تحاولش تقلل من شاءنها أو تكدب عليها .
فعلا الإنسان مش بيحس بالحاجة إلا لما تضيع منه...و اللي خسر حب ست مخلصه يبقي خسر حياته كلها.
لو اتعلمنا الاخلاق وبقي عندنا وعي ديني ناحية حقوق المرأة مش هيبقي في ظلم..ولا اهانه..ولا طلاق بالعكس هيكون ربنا كرمنا في حياتنا ......استوصوا بالنساء خيرا .....ياريت نراعي ربنا ونتقي ربنا فيهم .
لازم تكون راجل ليها مش عليها ده انت سندها وامانها في الدنيا من بعد اهلها ..
من هنا هتكلم عن الموضوع بشكل تفصيلي شويه !!
الجواز بيعتبر أكبر فرصة تغيير متاحة للعروسين مع بداية حياتهم الزوجية ,لما يقرروا يتجوزوا..
بيحطوا قائمة تخيلية بكل الصفات والأحلام اللي عايزين يتصفوا بيها بعد الجواز ..
في البداية بيحاول الزوج لاسباب مادية وعائليه إقناع زوجته بالسكن مع أهله لفترة من الزمن بحجة توفر الميزانية الكافية لشراء منزل خاص بيه ..
لكن السكن مع أهل الزوج ليه حسناته وسيئاته فهو بمثابة سيف ذو حدين.
وطبعا كلنا عارفين الحسنات والسيئات دي مثال علي ذلك تدخل حماتك بشكل دائم في حياتك اللي لسه بتبدأ.
ايه هي المشاكل اللي بتحصل بين الزوجه واهل الزوج ؟
كتير من المشاكل بتحصل تحت مسمي بيت العيلة بتؤدي لنهاية الحياة الزوجية وطلب الطلاق..
ده بيدفع البنات المقبلة على الزواج رفض فكرة الجواز فى بيت العيلة بشكل نهائى..
ان كنتي بالفعل إخترتي شريك حياتك فأنتي هتسكني معاه في المكان اللي هو يختاره.
لكن ايه رأيك لو قالك هنسكن في بيت عيلة هل هتوافقي بسبب حبك ليه وتتمني في يوم انك تروحي مكان تاني لما ظروفكم تسمح.
فطبعا بتكون نتيجة اللي بيحصل ده بيحصل إحتكاكات ومشاحنات بتتسبب في خصومات وبناءا عليه ينبغي وجود حدود واضحة فى العلاقات لتقليل المشاكل طبعا بين الزوجه واهل الزوج.
فالسكن مع أهل الزوج بيؤدي لفشل العلاقة الزوجية بسبب عدم القدرة أحياناً علي التأقلم مع البيئة الخاصة بأسرة الزوج من جهة , وعدم القدرة علي التحاور والتعايش مع أفراد الأسرة من جهة أخري, وخاصتا أم الزوج أو إخوته وعدم تحمل الزوجين للمسؤولية بشكل كامل لانهم جزءاً من قالب أسري كبير.
في كتير من المشكلات اللي بتنتج عن مشاركة الزوجين أسرة الزوج في بيت واحد أو علي الأقل بيت مشترك ومن المشاكل دي
اول حاجه : أهل الزوج بيعرفوا بكل تفاصيل حياتك ومواعيد الدخول والخروج الخاصة بيكي وبزوجك كمان ..
وبيكونوا على علم تام بأي حد بيجي لزيارتك وكل شىء فى بيتك بيكونوا عارفينه ..
كمان بيتدخلوا فى كل تفاصيل حياتك وبيتحكموا فيها،
وده بيسبب مشاكل كتير بينك وبينهم
وبينك وبين زوجك، فلازم تفكرى كويس من البداية .
كمان هتلاقيهم بيدخلوا فى القرارات المصيرية بحياتك بشكل أكبر، مقارنة بإذا كنتي بتسكني فى بيت بعيد عن بيت العيلة ، ومن أهم القرارات دي اللي بيتدخلوا فيها هو قرار الإنجاب وغيره.
في بعض الأوقات هتلاقي حماتك بتطلب منك تساعديها فى شغل البيت ، خاصتا إذا كنتي مش بتشتغلي ، فحماتك بتعتقد أن ده حق مكتسب ليها.
ومن هنا لازم تقفى معاها وقفة حازمة من البداية برفض هذا الأمر رفضاً تاماً.
ربما تشهد حياتك الزوجية كمان زيادة المشاكل بينك وبين أهل الزوج , بسبب زيادة الإحتكاك بينك وبين أهله..
وده سبب رئيسى بيخليكي تبتعدي عن الزواج فى بيت العيلة من البداية ، خاصة إذا كان الزوج لم يحسن التصرف معاكي..
كمان المقارنة بينك وبين إخواته البنات مش هتنتهي , هيتم مقارنة بينك وبينهم بشكل كبير خصوصا داخل بيت العيلة .
كمان إخوات الزوج البنات هيكونوا ليكي حموات بخلاف أم الزوج طبعا, وتشتعل الغيرة بينهم وبينك ويبدءوا يتحكموا فى تربية اولادك ، وده المعروف من مشاكل بيت العيلة. الحموات كمان بتتحكم فى تربية الأحفاد وهنا بيكون في تعارض بين اسلوب تربيتك لاولادك واسلوب حماتك في تربيتهم .
ليست هناك تعليقات:
إرسال تعليق