باقولك إيه
ماتيجي نبيع قلوبنا بلاش
ونتصدق على روحنا
بكام ذكرى
وكام موال
و نقرا الفاتحة ع العاشقين
مدام خايفين من الآتي
و من ماضي
مخيم فوق ضلوع القلب
نظرة عين بتداري ورا دمعةو قولة آآآه
بلاها نحب
بلاها العيشة ع الهامش
ما تتاخر ياعم القلب ....
سيبنا نعيش
مدام عايشين مع الاموات
مدام شوقنا ... سكات ف سكات
تٓعٓبنا القلب
تِعِبٔنا خلاص من الأحلام
تِعبنا نرسم الفرحة على الأعتاب
لا شمس الحب دفتنا
ولا بيتنا زاروه الاحباب
باقولك إييييه يا موال الهوى الدايب
بلاش تنعي على المكتوب
و ع اللي ملوش في الهوى نايب
ناعسه خلاص كرهت قص ضفايرها
ومش ح تبيع سنين العمر
و تداوي جراح أيوب
جراح آيوب أكبر من غرام حوا
و تاهت حوا في الحودايت
و في الميادين
مع المولد
مولد عم ابو الدنانير
يا ليلي يا عين
يا كاس مكسور من الآخر
واخدنا لفين ؟!
عطاشى يا دنيا كدابة
كأس الحب مش لينا
بلاش تقليب يا عم القلب بكفاية
لم الدور
يلا ندور ويا رحاية قسَاية
نجري عليها بالمشوار
تطحن قلبنا فينا
تدٓرِّينا
ننسى معاها
كان ياما كان
ونرضى بظلمها لينا
ليست هناك تعليقات:
إرسال تعليق