كان ياما كان ياسادة ياكرام ولا يحلى الكلام الا بذكر النبي عليه الصلاة والسلام...
كان في مرة زمان اتنين اخوات شاطرين وحلوين وبيسمعوا الكلام، كل يوم
يرجعوا من مدرستهم عارفين المطلوب منهم ايه...
يتغدوا ويكتبوا واجباتهم ويطلبوا من ماما انهم يلعبوا مع بعض شوية، وبمجرد ما ماما توافق يبدأ الخناق وماما زي كل مرة تهديهم وتصالحهم... ماما جت في يوم تعبت فعلاً من كتر خناقهم مع بعض فقررت انها تجمعهم وتفهم منهم ليه بيتخانقوا...
رد الولد الكبير وقال :انا بحب اخويا بس هو دايما بيزعلني ومش بيخليني العب براحتي... ويرد الصغير ويقول :لا ياماما هو اللي دايما بيضايقني وبياخد مني اللعبة اللي بحبها...
ردت ماما وقالت:انتم عارفين انكم أخوات، والأخوة دي أجمل علاقة ربنا سبحانه وتعالى خلقها علشان تساندوا بعض وتشجعوا بعض مش تزعلوا من بعض وتتخانقوا كل شوية..
انتم عارفين ان سيدنا موسى عليه السلام طلب من ربنا انه يجعل اخوه سنده في الدعوة لعبادة الله وربنا تقبل دعوته وقال في كتابه العزيز... بسم الله الرحمن الرحيم (سنشد عضدك باخيك) صدق الله العظيم يعني ربنا بيوضح أن الأخ بيقوي اخوه...
وانتم المفروض بتلعبوا مع بعض علشان تستمتعوا مش تتخانقوا، تعالوا نعمل خطة للعب علشان منزعلش من بعض تاني وافق الولاد على كلام ماما وفهموا أن العلاقة اللي بينهم ماينفعش يكون فيها أي زعل نهائي وأصبحوا بيخافوا على بعض جداً وقدروا فعلا يستمتعوا باللعب من غير خناق أو زعل وأصبحوا اخين حلوين فعلا شكلاً وخلقاََ وماما وبابا كانوا فرحانين بيهم جدا. وكمان علشان يقدروا يكونوا اخوات بالطريقة الجميلة اللي ربنا بيحبها.... وتوتة توتة خلصت الحدوتة واستنونا في حدوتة جديدة مفيدة
جميلة جدا
ردحذفربنا يوفقك يا استاذة شيماء
حذف