حدوتة ماما:ربنا خلقنا ليه؟! بقلم.شيماءأبوزيد

 كان ياما كان ياسادة ياكرام ولا يحلي الكلام إلا بذكر النبي عليه الصلاة والسلام. كان في زمان ولد جميل في يوم من الأيام لقي نفسه حيران في سؤال راح لمامته وسألها؛ ماما ربنا خلقنا ليه؟! ردت ماما وقالت : ربنا
خلقنا عشان نعبده ونعمر الأرض. رد الولد وقال : ازاي نعبده ياماما وليه ؟! ردت ماما وقالت : نعبده علشان ربنا سبحانه وتعالى خلقنا وفضلنا على كل المخلوقات التانيه وكمان كرمنا بالعقل والتفكير وفضلنا بالعلم. نعبد ربنا سبحانه وتعالى لأنه أمر الملايكه انها تسجد لبني آدم . ووهب لنا نعم كتير جدا لازم نشكر ربنا عليها. رد الولد وقال : معقول؟! يعني ربنا بيحبنا اوي كده ، طيب ياماما ممكن تعرفيني اعبد ربنا إزاى؟ ردت ماما وقالت : ياحبيبي ربنا سبحانه وتعالى أمرنا بحاجات بسيطة جدا وهيا أركان الإسلام، وطبعا احنا عارفينها كويس. رد الولد وقال : طبعا ياماما انا عارفها وهيا شهادة أن لا إله إلا الله وأن محمدا رسول الله وإقامة الصلاة وايتاء الزكاة وصوم رمضان وحج البيت لمن إستطاع إليه سبيلاً. ردت ماما وقالت : برافو ياحبيبي لكن الولد رد بسرعة على ماما وقاللها : لكن ياماما انا كتير بأكون مكسل أو مش قادر أصلي وساعات كمان الكارتون بيكون حلو ومش عايز أقوم أصلي .وأنا زعلان من نفسي كده... ردت ماما وقالت : طيب شوف ياحبيبي الصلاة هيا أجمل هدية انت ممكن تقدمها لنفسك. استغرب الولد وقال : لنفسي !!! ازاي ياماما احنا المفروض بنصلي لربنا سبحانه وتعالى. ابتسمت ماما وقالت : طبعا ياحبيبي لكن.... احنا ربنا سبحانه وتعالى بينادي علينا خمس مرات في اليوم علشان نصلي ونشكر ربنا على كل النعم اللي خلقهالنا ونتمني كل اللي نفسنا فيه، وربنا بقدرته وقوته يسخر كل حاجه حوالينا في تحقيق أمنياتنا. يعني احنا اللي محتاجين نصلي ايه رأيك تكون أنت إمامي في الصلاة وحدد لنفسك أمنية كل فترة واحنا بنصلي تطلبها من ربنا بيقين وخليك متأكد إن ربنا سبحانه وتعالى هيستجيب لو فيها خير ليك . الولد كان بيسمع مامته وهو فرحان جدا ومقتنع جدا جدا بكلامها وقرر انه خلاص اول ما يسمع الآذان يقوم بسرعة على مامته يخليها تتوضى وهو كمان يتوضى ويصلي إمام بماما وبابا واخواته كمان وكانت حياته مليانه بالسعادة والنجاح وتحقيق أصعب الأمنيات بفضل الله بعد ما واظب على صلاته وتوته توته خلصت الحدوته واستنونا في حدوته جديدة مفيدة