بدور عليك في كل حتة
وقلبي بيسأل عليك
مستني منك حتى كلمة
تطمني إنك بخير
بعدت عني مرة واحدة
من غير ما تتفق معايا
وتعمل إللي متعود عليه
أنا قلبي مش مطاوعني
ابطل أسأل عليك
وادور في كل حتة
عن ذكرى ليك
أصلك
مش بس صديقي
ولا جاري وزميلي
ده أنت اكتر من حبيبي
واكتر من شقيقي
ده أنت كنت زي ابويا
وامي واختي واخويا
كنت أول واحد في زعلي
اجري عليه
ولما بفرح كنت اسهر بالليالي
احكي ليك
وياما ضحكنا ضحك السنين
وياما دموعنا سقت عطشانين
كنت بتقاسمني فرحتك
وبتواسيني بضحكتك
وأنا دلوقتي اجري ع مين
اشكيله
من إللي واجعني
واحكيله ع إللي حصلي
لما فارقتني ومشيت
والحقيقة
مالاقتش غيرك
اترمي في حضنه احكيله
ع وجع فراقك ومر غيابك
وده أنا مش متعود عليه
أول ما فتحت عيني
لاقيتك
وفهمت الدنيا معاك
وياما وقعنا سوا
وياما عدينا
وياما الجرح كوانا
وياما الدنيا قست علينا
وكنا دايما بنهون
ع بعضينا
وحبيت حياتي بحلوها ومرها
عشان كنت بعيشها وياك
كنت دايما في حياتي
ولا بتغيب عن عيني يوماتي
واليوم إللي من غيرك
كنت بحس إني يتيم
لا بعرف اتكلم ولا اسلم
ومع أي حد غيرك
مش بطيق
انت كنت الهوا الصافي
وسط الرياح والزعابيب
وكنت زي حكاوي العصافير
ومعاك بس كنت بحس
إن الدنيا لسه بخير
سبتني ليه ومشيت
وخلتني زي المساكين
حالي يصعب ع الكافر
مش عارف أعيش
عادي و سليم
ولسه هفضل ادور عليك
و ع كل ذكرى ليك
يمكن تحس بيا
وتبعتلي تطمني عليك
ليست هناك تعليقات:
إرسال تعليق