قيمة الاعتذار. بقلم.شيماءأبوزيد.

 كان ياما كان ياسادة ياكرام ولا يحلي الكلام إلا بذكر النبي عليه الصلاة والسلام. كان في مره زمان ولد صغير كل شوية يزعل مامته وباباه ويقول آسف. كل شوية يزعلهم ويعتذر ويعيد نفس الغلط تاني. وماما وبابا علشان
بيحبوه بيسامحوه على طول لكن هو بردو يغلط تاني. في يوم من الأيام بيلعب مع أخته فأخد من أخته العروسة بتاعتها وكسر دراعها ، طبعا أخته زعلت جداً وكمان ماما وبابا لكن المره دي ...... ماما قالتله مش هنصالحك إلا لما تصلح غلطك سكت الولد شويه وبعدين قال:انا مش هاعرف اصلحها انا هاعتذرلها بس.مش حضرتك قولتي إن احنا المفروض لما نغلط نعتذر انا هاعتذرلها لأني مش هاعرف أصلحها . ردت ماما وقالت: ياحبيبي الاعتذار الكتير غلط وعدم الاعتذار بردو غلط المفروض اللي يغلط يعتذر ومايكررش نفس الغلط تاني وكمان يصلح غلطه. رد الولد وقال : ليه كده ياماما انا باعمل الغلط غصب عني وبازعلكم من غير قصد. ردت ماما وقالت : احنا لما بنعمل حاجه غلط بتزعل ربنا مننا بنتوب صح رد الولد وقال : طب والتوبة معناها ايه ؟ ماما قالت : بنتوب يعني نستغفر ربنا ونعاهد نفسنا أن احنا مش هنكرر الغلط تاني فا كده ربنا سبحانه وتعالى يسامحنا على طول بس لازم كمان نعمل حاجه كويسه علشان تمسح الوحش اللى عملناه بالظبط زي الاعتذار لما اغلط واعتذر بس مش كفاية لكن المفروض اعتذر وأصلح غلطي كمان وفعلاً محدش فينا هيصالحك غير لما تصلح العروسة وتصالح أختك رد الولد وقال : حاضر ياماما هحاول. وفضل طول النهار قاعد في اوضته مابيعملش أي حاجه غير إنه بيفكر يصلح العروسة ازاي مابيلعبش ومابيعملش حاجه خااالص كل تركيزه حقيقي في تصليح العروسة تعب جدا لغاية ماصلحها وراح فرح أخته بالعروسة واعتذرلها واتصالحوا ومن وقتها وهو بيحاول مايزعلش حد منه خالص لأنه فهم أن الاعتذار مش بس كلمة الاعتذار أفعال وتصرفات. وكمان مع أخته بأه بيحبها جدا وبيخاف عليها جدا وماما وبابا فرحانين جدا بيه لأنه فعلا الاعتذار قيمة كبيرة جدا والأهم من الاعتذار هو أني أتعلم وأصلح غلطي... وتوته توته خلصت الحدوته واستنونا في حدوته جديدة مفيدة