هتقابليه.. حبيبك اللي مكتوب عند ربنا هتقابليه. هتقابلي الراجل اللي تبقي نفسك وإنتي معاه وتبقي مرتاحة في قربه. هتقابلي الراجل الونس اللي وإنتو سوا هتضحكو علي أي حاجة وكل حاجة. هتقابلي الراجل اللي
ماتتكسفيش تتريقي علي نفسك وإنتي في حضنه ويقولك؛ ازاي بتقولي كده! ده إنتي قمر. هتقابلي الراجل اللي بوجوده هتفهمي ليه الموضوع مانفعش مع أي حد قبله. هتقابلي الراجل اللي تتمني تكبري في قربه وتحت عيونه. هتقابلي الراجل اللي يبقي أعز أصحابك، اللي خناقاتكو سوا بتقربكو أكتر مش بتبعدكو. هتقابليه بس بعد ماتعرفي إنتي مين وبتعرفي تعملي ايه هنا! رسالتك ايه ع الأرض! هتقابليه بعد ماتمشي رحلتك وتنضجي وتعالجي مشاكلك مع نفسك ومع أقرب الناس ليكي. هتقابليه بس مش هو اللي هيصالحك ع الدنيا، إنتي اللي هتتصالحي عليها لوحدك بعد ماتقعي وتقومي مليون مرة. صدقي إن فيه ستات كتير ربنا رازقها برجالة بجد؛ رجالة بتعرف تحتوي وتطبطب وتهتم، بس دول مابيتكلموش، صوتهم مش عالي زي التعبانين، معندهمش وقت يحكو ويقولو؛ مقضيين وقتهم بيشتغلو علي نفسهم، بيبنو حياة وبيستمتعو بيها. أيوا لسه فيه رجالة بجد.. وأيوا إنتي تستاهلي تبقي مع واحد منهم. وأيوا هتقابليه.. وأيوا هيقولك إنه محظوظ بيكي وإنك أعظم انجازاته. هتقابليه وهتحمدي ربنا علي وجوده. هتقابليه..
ليست هناك تعليقات:
إرسال تعليق