الكنايات العامية
القعدة على البساط معاكم (بترد الروح)
.. قعدة (اخر سلطنة ) .. البساط بيجمّع من الحبايب الف .. وكلامنا (بلا قافية) .. بالصلاة على النبى .. اللهم صل وسلم وبارك عليك يانبى .. طبعاً
بتقولوا ايه الكلام ده .. الكلام ده كلام المصريين .. ولاد البلد .. مفرادات المصريين وابتكارتهم ملهاش مثيل .. تملّى باقول (نرجع مرجوعنا) .. ايه التركيبة العجيبة دى ؟ الحقيقة قعدت افكر .. ازاى المصريين بيقدروا يركبّوا الكلمات دى على بعض .. والكلام يتنقل من جيل لجيل .. ومن أول ما نوعى على الدنيا - أهو تعبير ( نوعى على الدنيا ) من ضمن التعابير المصرية الصميمة - بالظبط زى الأمثال العامية المصرية اللي قلت لكم إن الأديب والعالم أحمد باشا تيمور جمعها فى كتابه الموسوعى العظيم ( الأمثال العامية ) .. واللي كانو اكتر من 3 تلاف مثل ، بالظبط 3188 مثل ، عارفين كل لما احب ارجع لعبقرية المصريين ، واحاول اغوص جواهم .. افتح كتاب الأمثال العامية.. كنت تمللي باسأل نفسي ايه اللي خللي الراجل اللى من الطبقة الأرستقراطية ده .. يلف فى الشوارع والحوارى ويسمع من ولاد البلد المصريين علشان يجمع الأمثال .. نرجع مرجوعنا لكلام المصريين اللي مالوش زى .. ولو اننا مبعدناش قوى .. ليه .. لأنى لقيت كتاب تانى لاحمد باشا تيمور مايقلش روعة ولا موسوعية عن كتاب الأمثال العامية .. الكتاب اسمه ( الكنايات العامية ) .. طبعا فاكرين دروس البلاغة فى اللغة العربية فى ثانوي ، الكناية ، والإستعارة المكنية .. الكنايات العامية يعنى التراكيب الكلامية اللي اخترعوها المصريين علشان اى حد يفهم المعنى من الكناية دى ، تخيلوا ان الراجل العظيم ده جمع الثروة اللغوية دى وحفظها لنا ، ليه باقول كده ؟ لأن زى كل حاجة ف الدنيا ، بتندثر كنايات وبيظهر كنايات جديدة ، المصريين عندهم كل يوم جديد .. خلينا النهاردة نقتطف من الكنايات المصرية الجميلة والبليغة دى ، ونفتكرها مع بعض ، تلاقى واحد ماسك ساندوتش قبل الغدا ،و لما تقوله مش هتعرف تتغدى يرد عليك : دى ( تصبيرة ) ، تعبير رائع جاى من الصبر ، تقوله براحتك بس هيفوتك المحشى بتاع الحاجة دا محشى ( تاكل صوابعك وراه ) ، تخيل الصورة ! ، صوابع المحشى من طعامتها مش هتحس انك أكلت صوابعك ، تلاقيه بيرد عليك : ( بورّيه منك بورّيه ) انت جوعتنى ، فانت علشان تكمّل عليه تقول له : براحتك ده مش (قرديحى) - يعنى من غير لحوم - ايه الكناية الغريبة دى ؟ ، ده معاه (زَفَر ) يعنى (دكر بط) ، أى مصرى يسمع (زَفر ) يعرف إنه دكر بط (متربى على الغالى) - تعبير عن انه بلدى وكبير وفخم ودسم كمان - فيرد عليك : (انت بلوة مسيحة) ! ، طيب بلوة من البلاء ، لكن مسيّحة دى جت منين ؟ ، زى السمن البلدى السايح ملهلب ويحرق اللى يلمسه ، وتسأله : انت كنت فين امبارح ؟ ، يرد عليك : كنت ف حفلة بس ايه زحمة موت ( ترش الملح ما ينزلش ) ، بس شفت بنت ( تحل من على حبل المشنقة ) ، تعبير تعرف منه من غير تفسير قد ايه البنت جميلة ، بس هو لسه عنده كناية تانية ، بنت ( تقول للقمر قوم وانا أقعد مطرحك ) ، كأن القمر بيقعد ! ، وتقول له : طيب كلمتها ؟ ، يقول لك : لأ ، تسأله : ليه ؟ ، يقول لك : (التقل صنعة) ، التعبير ده اللى كل المصريين فاهمينه ، اتركّب كده إزاى ؟ ، ترد عليه : تُقل إيه يابنى (إنت هتجيب لي نقطة) ! ، والّا حكاية النقطة دى !؟ ، طيب تسأل أى حد إيه هى النقطة ؟ ، يجاوبك : يعنى رفعت ضغط دمى من الإنفعال لدرجة قاتلة ، حتى الطب للمصريين فيه تعابير خاصة ، زى اللي تسأله : مالك ؟ ، يقول لك : (بطنى ماشية) .. هى البطن بتمشى ؟! ، لازم تندهش قدام الكنايات العامية المصرية ، لما تتأثر من تصرف إتعمل معاك وتشتكى لصاحبك وتقول له : دا انا كنت باعتبره أخ يعمل كده فيا ؟ .. يرد عليك : (صوابعك مش زى بعضها ) ، تقول له : يعنى توصل للخناق ؟ ، فيرد عليك : ياسيدى .. (معلش ) .. (مصاريين البطن بتتخانق) ، شايفين فى موقف واحد 3 كنايات أجمل من بعض ، لأ ولسه ، إنت وإنت زعلان ترد على صاحبك : ( ولما معلش قتلوه ليه ) - كناية رابعة - تفكرك بام كلثوم لما تقول : ( تفيد بإيه ياندم .. وتعمل ايه ياعتاب ) ، حتى المصريين خدوا من الأغانى كنايات ، لما تحاول تصالح حد زعلته وهو لسه واخد على خاطره - الله الله - تعبير (واخد على خاطره) ده من أرق الكنايات المصرية ، يدل على إنك زعلان بس ناوى تسامح .. فيرد عليك : ( فات المعاد ) ، والا لما حد يكون قسي عليك ويجى لك حد يقولك : (علشان خاطرى ) ، الصبر جميل - قد إيه رقيق تعبير (علشان خاطرى) ، ترد وانت مكشّر : (للصبر حدود) ، وحتى الأفلام بقى فيه كنايات منها ماتتنسيش ، اتنين منهم للفنان الجميل استيفان روستى ، (نشنت يافالح ) ، والتانى ( دقيقة واحدة .. اتحزم واجيلك ) ، ومن الكنايات للى خاب أمله .. ( راجع قفاه يقمّر عيش ) ، ولما تتكلم على واحد بخيل تقول : (جلدة) ، طيب اشمعنى الجلدة ، كناية كلنا فاهمينها بس مش عارفيين ليه ؟! ، ولما تكون بتجامل حد وجايب له هدية تقول له بخجل وتواضع : (على قد ما قُسُم) ، والا لما تقدم واجب للضيف تقول : (الجودة م الموجود) ، ايه الجمال ده ، طب تصدقوا بالله .. انا (الدمعة هتفر من عينى) ، و (قلبى طاير من الفرح ) بالمصريين المبدعين اللى كل ما تغوص فيهم تلاقيهم (بيفهموها وهى طايرة) ، شعب قلبه ابيض زى البفته .. شعب فيه شئ لله .. نهاركم فل .
.. قعدة (اخر سلطنة ) .. البساط بيجمّع من الحبايب الف .. وكلامنا (بلا قافية) .. بالصلاة على النبى .. اللهم صل وسلم وبارك عليك يانبى .. طبعاً
بتقولوا ايه الكلام ده .. الكلام ده كلام المصريين .. ولاد البلد .. مفرادات المصريين وابتكارتهم ملهاش مثيل .. تملّى باقول (نرجع مرجوعنا) .. ايه التركيبة العجيبة دى ؟ الحقيقة قعدت افكر .. ازاى المصريين بيقدروا يركبّوا الكلمات دى على بعض .. والكلام يتنقل من جيل لجيل .. ومن أول ما نوعى على الدنيا - أهو تعبير ( نوعى على الدنيا ) من ضمن التعابير المصرية الصميمة - بالظبط زى الأمثال العامية المصرية اللي قلت لكم إن الأديب والعالم أحمد باشا تيمور جمعها فى كتابه الموسوعى العظيم ( الأمثال العامية ) .. واللي كانو اكتر من 3 تلاف مثل ، بالظبط 3188 مثل ، عارفين كل لما احب ارجع لعبقرية المصريين ، واحاول اغوص جواهم .. افتح كتاب الأمثال العامية.. كنت تمللي باسأل نفسي ايه اللي خللي الراجل اللى من الطبقة الأرستقراطية ده .. يلف فى الشوارع والحوارى ويسمع من ولاد البلد المصريين علشان يجمع الأمثال .. نرجع مرجوعنا لكلام المصريين اللي مالوش زى .. ولو اننا مبعدناش قوى .. ليه .. لأنى لقيت كتاب تانى لاحمد باشا تيمور مايقلش روعة ولا موسوعية عن كتاب الأمثال العامية .. الكتاب اسمه ( الكنايات العامية ) .. طبعا فاكرين دروس البلاغة فى اللغة العربية فى ثانوي ، الكناية ، والإستعارة المكنية .. الكنايات العامية يعنى التراكيب الكلامية اللي اخترعوها المصريين علشان اى حد يفهم المعنى من الكناية دى ، تخيلوا ان الراجل العظيم ده جمع الثروة اللغوية دى وحفظها لنا ، ليه باقول كده ؟ لأن زى كل حاجة ف الدنيا ، بتندثر كنايات وبيظهر كنايات جديدة ، المصريين عندهم كل يوم جديد .. خلينا النهاردة نقتطف من الكنايات المصرية الجميلة والبليغة دى ، ونفتكرها مع بعض ، تلاقى واحد ماسك ساندوتش قبل الغدا ،و لما تقوله مش هتعرف تتغدى يرد عليك : دى ( تصبيرة ) ، تعبير رائع جاى من الصبر ، تقوله براحتك بس هيفوتك المحشى بتاع الحاجة دا محشى ( تاكل صوابعك وراه ) ، تخيل الصورة ! ، صوابع المحشى من طعامتها مش هتحس انك أكلت صوابعك ، تلاقيه بيرد عليك : ( بورّيه منك بورّيه ) انت جوعتنى ، فانت علشان تكمّل عليه تقول له : براحتك ده مش (قرديحى) - يعنى من غير لحوم - ايه الكناية الغريبة دى ؟ ، ده معاه (زَفَر ) يعنى (دكر بط) ، أى مصرى يسمع (زَفر ) يعرف إنه دكر بط (متربى على الغالى) - تعبير عن انه بلدى وكبير وفخم ودسم كمان - فيرد عليك : (انت بلوة مسيحة) ! ، طيب بلوة من البلاء ، لكن مسيّحة دى جت منين ؟ ، زى السمن البلدى السايح ملهلب ويحرق اللى يلمسه ، وتسأله : انت كنت فين امبارح ؟ ، يرد عليك : كنت ف حفلة بس ايه زحمة موت ( ترش الملح ما ينزلش ) ، بس شفت بنت ( تحل من على حبل المشنقة ) ، تعبير تعرف منه من غير تفسير قد ايه البنت جميلة ، بس هو لسه عنده كناية تانية ، بنت ( تقول للقمر قوم وانا أقعد مطرحك ) ، كأن القمر بيقعد ! ، وتقول له : طيب كلمتها ؟ ، يقول لك : لأ ، تسأله : ليه ؟ ، يقول لك : (التقل صنعة) ، التعبير ده اللى كل المصريين فاهمينه ، اتركّب كده إزاى ؟ ، ترد عليه : تُقل إيه يابنى (إنت هتجيب لي نقطة) ! ، والّا حكاية النقطة دى !؟ ، طيب تسأل أى حد إيه هى النقطة ؟ ، يجاوبك : يعنى رفعت ضغط دمى من الإنفعال لدرجة قاتلة ، حتى الطب للمصريين فيه تعابير خاصة ، زى اللي تسأله : مالك ؟ ، يقول لك : (بطنى ماشية) .. هى البطن بتمشى ؟! ، لازم تندهش قدام الكنايات العامية المصرية ، لما تتأثر من تصرف إتعمل معاك وتشتكى لصاحبك وتقول له : دا انا كنت باعتبره أخ يعمل كده فيا ؟ .. يرد عليك : (صوابعك مش زى بعضها ) ، تقول له : يعنى توصل للخناق ؟ ، فيرد عليك : ياسيدى .. (معلش ) .. (مصاريين البطن بتتخانق) ، شايفين فى موقف واحد 3 كنايات أجمل من بعض ، لأ ولسه ، إنت وإنت زعلان ترد على صاحبك : ( ولما معلش قتلوه ليه ) - كناية رابعة - تفكرك بام كلثوم لما تقول : ( تفيد بإيه ياندم .. وتعمل ايه ياعتاب ) ، حتى المصريين خدوا من الأغانى كنايات ، لما تحاول تصالح حد زعلته وهو لسه واخد على خاطره - الله الله - تعبير (واخد على خاطره) ده من أرق الكنايات المصرية ، يدل على إنك زعلان بس ناوى تسامح .. فيرد عليك : ( فات المعاد ) ، والا لما حد يكون قسي عليك ويجى لك حد يقولك : (علشان خاطرى ) ، الصبر جميل - قد إيه رقيق تعبير (علشان خاطرى) ، ترد وانت مكشّر : (للصبر حدود) ، وحتى الأفلام بقى فيه كنايات منها ماتتنسيش ، اتنين منهم للفنان الجميل استيفان روستى ، (نشنت يافالح ) ، والتانى ( دقيقة واحدة .. اتحزم واجيلك ) ، ومن الكنايات للى خاب أمله .. ( راجع قفاه يقمّر عيش ) ، ولما تتكلم على واحد بخيل تقول : (جلدة) ، طيب اشمعنى الجلدة ، كناية كلنا فاهمينها بس مش عارفيين ليه ؟! ، ولما تكون بتجامل حد وجايب له هدية تقول له بخجل وتواضع : (على قد ما قُسُم) ، والا لما تقدم واجب للضيف تقول : (الجودة م الموجود) ، ايه الجمال ده ، طب تصدقوا بالله .. انا (الدمعة هتفر من عينى) ، و (قلبى طاير من الفرح ) بالمصريين المبدعين اللى كل ما تغوص فيهم تلاقيهم (بيفهموها وهى طايرة) ، شعب قلبه ابيض زى البفته .. شعب فيه شئ لله .. نهاركم فل .
ليست هناك تعليقات:
إرسال تعليق