لما بيجيلك شوية برد ... بتلاقي نفسك حاسس إنك هش وضعيف.. مش قادر تقف على رجليك ولا تتحرك. وجسمك كله متهمد ومتكسر... اهو الهشاشة النفسية اللي هقولك عليها... اصعب مليون مرة من الام جسمك ..
المتهمد والمتكسر من البرد. أعراضها ... #إنك على طول صعبانه عليك نفسك.. مجرد كلمة بسيطة ويمكن من غير قصد .. تغير مودك وتزعلك. #إنك مش فارق معاك وجود اي حد جنبك اللي عاوز يمشي يمشي واللي عاوز يبعد يبعد. #إنك تبطل تعتذر لحد أو تعتب على حد أو تلوم حد أو حتى تمتن لحد. #إنك تتوقف عن البحث عن اي حاجة كانت بتفرحك وتسعدك قبل كده. #إنك بقيت مابتستمتعش باي حوار او كلام. مع اي حد سواء كنت تعرفه أو ماتعرفوش. #إنك تلاقي أسعد اوقاتك وانت بعيد عن كل الناس..لوحدك ومع وحدك . #إنك تحس إن الحاجات اللي كانت بتلفت نظرك قبل كده. بقت تافهة وساذجة ومالهاش اي لازمه او طعم #إنك تحس بالندم على فرص كتير.. ضاعت منك خدمت بيها ناس مايستهلوش ونسيت فيها نفسك #إنك تكتشف أن اللي حواليك ،.. ماكانوش بيحبولك لشخصك.. كانوا بيقربوا منك بس لمصالحهم ومنافعهم #إنك تلاقي دمعتك قريبة من عينيك.. #إنك مش عاوز لا تفكر ولا تتصرف ولا تتحرك، كأنك إنسان حي ميت جوه جسمه.. #إنك بقيت حساس زيادة عن اللزوم.. وتخاف قوي إن حد يخدش مشاعرك .. بكلمة او بموقف. #إنك تجد أن كل الوان الطيف.. بقت في عينيك.لون واحد بس.. وكل المذاقات بقت في حلقك ... مذاق واحد بس ومر كمان ساعتها يا عزيزي.. لازم تشوفلك حل سريع مع نفسك. اللي تعبت قوي ومحتاجه تقابلك ضروري.. ولما تقابلها... عاوزك تصالحها وتطبطب عليها وترضيها وتراضيها.. وقولها.. آسف يانفسي ..انا جيت عليك كتير... مجرد احساسك بيها ورفقك ومودتك معاها كفيل انه يغير مودك ويغيرك كلك... #مجرد_ خاطرة ا.د. فتحي الشرقاوي أستاذ علم النفس بجامعة عين شمس
ليست هناك تعليقات:
إرسال تعليق