لما انت مش قد الجواز والخلفة... بتتجوز ليه .. انت عارف كان وضعك الطبيعي إيه .. انك تقعد جنب الحاجه امك.. تأكلك وتشربك وتلبسك وتحميك وتليفك بالليفه الناعمه كمان. ماهو مش معقووول يامغفل.. سايب بيتك على طول وماتعرفش عنه حاجه... وملموم على شوية من المقاطيع
اللي زيك. وقاعدين كل ليلة على القهوة... بتشربوا وبتشيشوا وبتسجروا .. وبتلعبوا بلاي ستيشن ..واخر روقان... ويادوب بترجعوا بيوتكم آخر الليل... علشان تتخمدوا وتناموا نامت عليكم حيطه كأن شققكم بقت اوتيلات .. للبس والقلع والخروج والنوم بس لا بتشوفوا طلبات بيت.. ولا متطلبات ابناء وبنات... ولا بتعرفوا مشكلات زوجات... ولا اي نيله.... خدوا بقى معايا....أنتم عارفين يااغبياء... ايه اللي ممكن يترتب على الوضع ده .. على المدى البعيد #ابتعاد المسافات النفسية بينك وبين مراتك وده اول الطريق لجمود و تصلب مشاعر الدفء بينكما. وبالتالي كثرة الخلافات والصدامات #عدم معرفتك ة بما يحدث داخل أسرتك هيترتب عليه برود في التفاعلات الانسانية بين الجميع. وده مدخل للتفكك والطلاق العاطفي والخرس الزوجي #عدم ارتباط الأبناء والبنات بيك كأب .. وعلى المدى البعيد مش هتكون مؤثر.. في حياة اولادك لما يكبروا.. لان كل مشاكلهم بتتحل عن طريق امهم.. وانت قاعد تشيش مع المقاطيع اللي زيك و ممكن كمان علاقتهم بأمهم .. تسوء لأنها بتقوم بدورها كأم ودورك كأب في نفس الوقت. وده هيسبب لهم صراعات نفسية غير طبيعية #ابتعادك عن اولادك قد يخلق مشاعر الجفوة بينك وبينهم. اه بقى لو كانت النزعات الدينية والاخلاقيه.. للست مراتك هشه وضعيفه. .. يبقى كده حضرتك بتفتح قدامها الباب.. للانحراف بكل أشكاله ..ركز في دي ياغبي لتعويض النقص العاطفي لغيابك... كفايه هبل وعبط وهطل يا أزواج.... محدش منعك انك تخرج مع زمايلك .. لكن كل يوم ..كل يوم..كل يوم.. كده انت بقيت عيل صغير .. مابيفكرش غير في نفسه.. و ساعتها ماتزعلش.. لو سحبنا منك لقب رجل.. وصادرنا منك لقب زوج مسؤل... استقيموا يرحمنا ويرحمكم الله #مجرد_ خاطرة ا.د. فتحي الشرقاوي أستاذ علم النفس بجامعة عين شمس
ليست هناك تعليقات:
إرسال تعليق