قل ولا تقل - سما رامى

شهر أكتوبر شهر التوعية بأصحاب متلازمة داون عشان كده أنا عاوزة من خلال المقال ده أقول لك إحنا اسمنا متلازمة داون ولا تقل منغولى أو منغولية أوعى حد يضحك عليكم ويقول إن اصحاب متلازمة داون مرضى
أو يقول مرض متلازمة داون..... أوعى حد يضحك عليكم ويقول إن اصحاب متلازمة داون عمرهم قصير و بيموتوا على طول.... أوعى حد يضحك عليكم ويقول إن اصحاب متلازمة داون هبل وعبط و منغوليين ومعاقين ذهنيا..... أوعى حد يضحك عليكم ويقول إن اصحاب متلازمة داون مش بيتعملوا أو مش بيفهموا........ اسمعوا كلامى أنا بس من أصحاب متلازمة داون...... متلازمة داون عبارة عن نسخة إضافة فى كروموسوم ٢١....بدل ما يكون ٢ بقى ٣ ال كروموسوم الزيادة ده عمل حاجات كتيرة آوى حلوة فينا : أولا : بنحب كل الناس من قلوبنا بدون مصالح ثانيا : مش بنعرف يعنى إيه كراهية أو حقد وغل ثالثا : خلى بالكوا عندنا حاجة إسمها شفافية يعنى بنعرف الناس الكويسة والناس الوحشة بلاش الناس الوحشة يقربوا مننا..... رابعا : عندنا إرادة من حديد وعزيمة وتحدى الصِعاب.... خامسا : إحنا بنتعلم كويس جدا كل حاجة... إيه المشكلة إن يكون فى اهتمام زيادة عن باقى الناس.... إيه المشكلة لما يكون في أدوات لتعليم أصحاب متلازمة داون مختلفة عن باقى الناس...... لو ده اتوفر لكل أصحاب متلازمة داون مش هيبقى في حد عنده تأخير القدرات الذهنية.... سادسا : شكلنا مختلف عن الناس..... إحنا أحلى وأجمل من ناس كتيرة..... والجمال فالروح مش فالشكل... سابعا : المرض دا ابتلاء بإيد ربنا بيصيب أصحاب متلازمة داون وبيصيب الناس كلها.... المهم مين هيصبر ويحمد ربنا على الابتلاءات...... ثامنا : الموت دا الحقيقة الوحيدة إللي فالدنيا..... ربنا اختص بيه كل الانفس وليس أصحاب متلازمة داون فقط...... تاسعا : وأخيرا إحنا ربنا خلقنا عشان نعلم الناس ازاى يحبوا بعض.......