الكذبه الأولي ... بقلم داليا زردق

اول لقاء بين بنت و ولد

احساس و مشاعر بتوديهم السما
 بعد فترة بيموت اول لقاء و بيظهر الوجه الحقيقي لكل واحد
 الصوت الحقيقي
الماديات الحقيقيه
الغضب الحقيقي

العصبيه الي كانت مستخبيه
 الافكار الي كانوا بيتازلوا عنها عشان بس كل واحد يكسب حب التاني في اول العلاقه
 و فجاه تتحول العلاقه لهم و غم و تقل و حزن و محاوله للانفصال...
 كذبة اول ايام الخطوبه
 و الاستعداد للفرح
 كل شيء كان جميل
لا يوصف زي الحلم
 البنت حتطير من السعادة
 بس بعد الجواز ....😔
 البنت حتطير من الشباك عشان تنتحر
 و الرجل حيغمض عينيه يمكن يطلع كابوس حيفوق منه
 كذبة ابني الي حموت عليه
 اول حمل ....اول ولاده
مشاعر لا توصف
سعاده لا تقارن بغيرها
 بس بعد فترة بتوصل ان نفس الام دي هي برده الي بتقول انا عملت كده ليه في نفسي
 هي الي بتخلي الاب بره البيت ٢٤ ساعه هربان من كل ده
 و الام منهارة بتحاول كل يوم تلصم نفسها عشان تكمل دور الام و الزوجه بدون جرايم و إصابات
 كذبة اول يوم مدرسه
بيبقي الطفل حيموت و يروح المدرسه
 بعد فترة بيبقي في البيت بيجري و يعيط كل يوم الصبح و هو بيصرخ انه بيكره المدرسه و الدراسه و مش حيروح
و بتختفي لحظات الانهيار من الحماس الأولي لما قلناله جبنا شنطه المدرسه و انت كبرت
 كذبة اول يوم عمل في مكان جديد
 و انت فرحان بالزمايل الحلوين و المكان الجديد
 بعد فترة كل زميل بيبان علي حقيقته و بتظهر طبيعته .
 و الابتسامات و المجاملات بتموت و انت بتموت معاها و بتتصدم كل يوم في كل واحد صدمه جديده
 و بتنتهي زيف اول لقاء بينك و بينهم و بتظهر حقيقة الوضع ... كذبة اول لقاء بينك و بين البواب و جيران البيت الجديد
 البواب مستعد عشانك يموت نفسه و الجيران بتبتسم و تسلم و تعرض تساعدك .. بعدين
البواب مش بيقوم من مكانه يساعدك لو شافك حتي شايل فيل
 و الجيران بيقفلوا الباب بسرعه قبل طلوعك عشان يتهربوا من كلمة مساء الخير
 و البواب الي كان وشه بيضحك و انت بتسكن و تجهز بيتك بيتحول لبوز غم عايز منك فلوس طول الوقت و بس
 كذبة اول ايام الجامعه
الي كل مراهق بيبقي حيموت و مجهز هدومه و حاله شهور و ايام و ليالي من الحماس و السعاده
 و بعد فترة
ماسك نفس الهدوم عايز يحرقها و هو مش مصدق ان دي الجامعه الي كانت حلم عمره
 و كذبة كلمة بحبك الي كل واحد فاكر انها حقيقيه
 هي مجرد وسيله لدخول شخص ادامك مشفر و اول ما تقولهاله و تدخل بتبقي مش محتاج تقولها تاني عشان بتكون خلاص معاك كل شيء و مش محتاج توصل لشيء
 و الحياه كلها نفس الكذبه دي الكذبه الأولي
 عشان كده لازم نتبع قاعدة هات من الاخر
 و نتعامل عادي في كل شيء من غير فرح او زعل
 من غير توقعات
من غير تمثيل ..
 من غير افورة ...
 خلينا نعيش شوية و احنا عادي ...
 احسن ما نعيش في كذب لا ينتهي