إننا لما بناخد صورة جماعية... في اي مناسبه أسرية أو عائلية أو مع الاصدقاء بنلاقي نفسنا مقربين من بعض قوي... لدرجة التلامس الجسدي الشديد... وكل ده طبعا مصحوب برسم ابتسامه عريضة قال ايه..علشان .....الصورة تطلع حلوه... تشيييييييييييز... وبعد ايام أو شهور أو سنين من
اخد الصورة.. تكتشف أن كان في الصورة... ناس مايستهلوش وفيها ناس خسارة يتقال عليهم حبايب... وفيها ناس ضربوك في ضهرك وانت مأمن ليهم نفسك وفيها ناس باعوا العيش والملح بالرخيص.. في اللحظه بتصعب عليك نفسك قوي.. وتبقى عاوز تقوم تقطع وتمزق الصورة وتفرتكها ألف حته. بس خد بالك انت لو قطعت الصورة.. يبقى بتقطع نفسك معاها وفيها.. لأ... تقطع نفسك ليه علشان حد مايستهلش عاوزك من هنا ورايح لما تيجي تتصور ياريت...تسيب مسافة بينك وبين كل واحد في الصورة. اهو لو طلع حلو واصيل يبقى هينور الصورة أما بقى لو طلع خسيس ونص كم ... يبقى مفيش قدامك غير انك تمسك مقص.. وتشيل وتحذف الشخص ده من الصورة.. لأن المسافة اللي عملتها معاه وانتم بتتصوروا. هتسمحلك تشيله و تقطعه من غير ماتقطع نفسك معاه و بعد ماتشيله..عاوزك... تبص لصورتك وانت بابتسامتك البلهاء... علشان تتذكرك دايما بهبلك وعبطك وساذجتك.. إن اقترابك قوووي من بعض الأشخاص بدون حساب.. ممكن يخليك تتعلم وتكون أكثر حرصا ف اللي جاي. سيبوا شوية مسافات ومساحات بينكم وبين بعض.
صدقوني هتحتاجوا إليها في لحظه ما مجرد خاطرة ا.د. فتحي الشرقاوي أستاذ علم النفس بجامعة عين شمس
ليست هناك تعليقات:
إرسال تعليق