جريدة ألماس الشرق-أفكارك سبب سعادتك وأحزانك -بقلم /ياسمين عبد الله (ماجستير صحه نفسيه)

                    أفكَارَك سَبب سعادتَك واحزانَك 

‫في علم النفس قاعدة بتقول (مَا تُمارِسَهُ يَوميًا سَوف تَتقِنَهُ بِكفَاءَة)

يعني لو بتمارس حُسن الظَن بالله يوميا هتعيش متطمن هادي البال ..

وفالمقابل هتبقى قلقان وخايف ديماً يبقى هتعيش تعيس ..

اسلوب حياتك هو نتيجة لأفكارك اللي بتمارسها ..

كل واحد فينا لو درَّب نفسه على الأمل والتفاؤل وحسن الظن يومياً هيتقنهم وحياته هتتحول ١٨٠ درجة ..

لو مش مرتاح في حياتك دوَّر على افكارك اليومية اللي بتمارسها وعايش بيها وهتعرف ان حياتك انعكاس ليها وغيّرها وهتتغير ..

لازم نبُص من زاويا تانية وعلى الأقل يبقى جوانا امل في اللي جاي ..

والستارة الغامقة اللي قدام عنينا ليل نهار نلمها شوية نسيب فرصة لنور الامل يدخل حياتنا وافكارنا شوية 

وما بين تفاصيل الايام طبَّق التجاهل عشان راحة بالك، وتطبيقك ده يعتبر دليل واضح على ذكائك لأن راحتك في اغلب الاوقات اهم من اي شئ، وإمشي بمبدأ (أعلَمْ كُلْ شَيء ولَكِنْ لاَ أسْمَح لأي شَيء بِأنْ يُعَكِّر مَزاجِي) وده بالنسبة للحجات الصُغيّرة ..

لكن في فعلاً تجارب بتكسَرنا، بس التجارب دي بتصنع منك حاجتين، إنك تبقى قَوِي، وإنك تبقى عاقِلْ، في حكمة بتقول : 

(لَنْ تَجِد إنسَانَاً قَويَاً دُونَ مَاضٍ حَافِلٍ بِالتَجارٍب، لا أحَد يَصِل لِمـَرحَلِةْ العَقلانِيةَ دُونَ أنْ يُدمَّر شَئٌ مَا فِي دَاخلهِ).

يعني التحطيم الداخلي اللي بيحصلّك ده، بيصنع منك إنسان قوي عاقل، هتمُر الفترات دي وهتبقى اقوى بس هي مسألة وقت والحياة هتشوفها سهلة لما تقوى الحكمة بتقول (الحَيَاةْ لا تُصبِحَ صَعبَةَ إنمَا انتَ مَن تُصبِحَ اضعَف، والحَيَاةَ لا تُصبِحَ سَهلةَ إنمَا انتَ مَن تُصبِحَ اقوىَ).

يبقى تجاهلك ونضجك بيصنع فيك القوة والصمود قصاد تحديات الحياة فاستمر ..

وحاول تبسط نفسك بنفسك، واتفرج على مُحفِّزين تستمد من روحهم الحلوة الأمل وراحة البال، يعني من الآخر كده عيش حياتك ..

وإفتكر إن افكارك هي مرايتك اللي بتشوف فيها سعادتك واحزانك ..

فخُد بالك انت بتمارس اي عشان هتتقنه كويس.