حلو القمر
صباح الخير ياللى معانا
الخير أهوعـَمْ جـُوَّانا
والـفجر شأشأ حواليـنا
والطـير ترفرف فـرحانا
صباح نادى صباح هادى
بالخير عليكى يابلادى
صباح الفل على خدودى
صباح مـيِّل على عودى
----------
بـعد الصباح واللى مـنُّه
هابدأ وأقول كلام تانى
البنت قالت لـى ياعـمُّوو
الـورد مـِزَوَّق فـستانى
فـستانى بـمبى وكرانيشه
والـكل عاجبه فـستانى
نـَادت عـلَيَّا بـرقِّـتها
وبصوت عـالى وحـيَّانى
غـَنِّت لـى غِـنوه بـشفايفها
شوفت فيها نغم تانى
---------
طـلع النهار
قوموا ياشـطار
روحوا بالمشوار
هاتوا لنا فطار
قبل الـقطار
مايفوت عالدار
نركب ونروح
زىِّ الشطار
--------
ردِّيـت عليها وقلت لها
على نغمه تانيه وتلحينها
الـشغل جميل
وجميل الشغل
زَىِّ العـصافير
هانطير عـالشغل
نـعمل بضمير
ونـزيد فى الـشغل
نرجع شـايلين
الخير للأهـل
رَدِّتْ عـليَّا بسلامتها
ورمت عـليا تحيتها
نـسجت لى غنوه بخـفتها
وبـدأت تقولها بطريقتها
---------
يـامَّا القمر عالباب
روحى ونادى له
يـامَّـا هـناك خُـطَّاب
كـتيير ونادى له
يـامَّا القـمر مكسوف
مافيش معاه فلوس
مـِدِّى له إيدك يـامَّا
ماسك فى إيده فانوس
فانوسه ده سحرى
يغنـينا عن الفلوس
يـامَّا القمر عـشقان
وردة جـنينتنا
بـاين عـليه ولهان
وبحب وردتنا
-----
ردِّيت عليها وقلت لها
غِنوه بدايتها
حـِلو القمر ........ حـلو
حـلو السهر.......... حلو
حـلو الكلام.......... حلو
عـلى الألحان........ حلو
---------
مسكـتنى هـيا عالقافيه
قالت لى عبارات شافيه
هُـوَّٰ الكلام يـحلىَٰ
قـبل مـا نـصلى
مـايبقالوش معنى
يـاللا يـامتولى
إبـدأ مـعايا وقول
صـلى على الرسول
قولت لها صلـينا
على محمد نـبينا
غـَنِّيت على الأرغول
وامدح فى الرسـول
رســولنا الغالى
شـفيع لينا على طول
ليست هناك تعليقات:
إرسال تعليق