من القلب للقلب
اللى بيخرج من القلب بيوصل للقلب و لو بعد حين ❤️
فى حد هيقول ليه فى ناس مش بيوصلها اللى طلع من القلب؟
.أول ما حد يخيرنى بينه و بين حاجة تانية تخص حياتى.
بختار الحاجة اللى تخص حياتى.
مش عشان الحاجة اللى تخص حياتى أهم... خالص ده ممكن الشخص يكون بحبه أكتر و أهم عندى.
بس فكرة إن حد عايز يتحكم فى أختياراتى و يجبرنى على فعل ده كفيل يخلينى أختار الحاجة التانية.
التضحية و التهاون و إنك تكون تحت رحمة و سيطرة حد بتبدأ بتنازل واحد (و جربتها و الشخص بيتمادى و بيفتكر نفسه بعد كده على حق مش إنك كنت مرن عشان بتحبه)
فى فرق بين شخص بيتفاهم و يتناقش و بيوضح وجهة نظره بأحترام و سايب مساحة حرية إختيار للآخر و بين الأبتزاز العاطفى و الأجبار و التحكم.
و الأبتزاز العاطفى ده لوحده إجبار و تحكم بشكل ناعم
الفكرة مفيش حاجة أسمها يا طريقى يا تمشى.
يبقى خلاص أمشى لأن الحياة مش طريقك بس فى طريقى و فى طريق ثالث مشترك ممكن نمشى فيه إحنا الأتنين أو طريق رابع و لا طريقى و لا طريقك بس هيخدمنا.
ملحوظة : قبل من نضرب بعرض الحائط الشخص لازم نفكر 100 مرة هو الشخص بيتكلم فى الحق و فى حاجة فعلاً عنده حق فيها و لا هواه و مزاجه و عشان نعرف نفصل لازم نكون أختياراتنا مش قائمة على أتباع هوانا و ممكن نستشير حد عنده حكمة و بنثق فى رأيه.
غير كده فلنختار أنفسنا
قول ( لا ) عشان تحافظ على نفسك و حقوقك.
دائماً بيتنصح بيها أنها تتقال للآخرين.
بس عارفين أكبر و أقوى ( لا ) محتاجة تتقال لمين ؟
تتقال لنفسنا.
لو أتعلمنا كل مرة نقول لا لنفسنا :
- و أحنا رايحين نعمل حاجة تغضب ربنا.
- و إحنا فاتحين حدودنا للآخر برغم أنه معتدى.
-و إحنا بنقول أة و إحنا بنوافق على حاجة مش حبينها و مش عايزينها.
- و إحنا بنفكر نعتدى على الآخر بالكلام أو الفعل.
- لكل مرة بنتهاون فى حق نفسنا أو حق غيرنا.
و لا كتيييييييييييير غيرهم.
اللى محتاج نقوله لأ... نفسنا لأن اللحظة اللى هنقول لأ لنفسنا مش هنحتاج نعمل مجهود نقول لأ للآخر.
وأنت قدمت كل الحب و العطاء لشخص مكنش بيبادلك الحب أو جرحك أو غير مناسب أو غيره..
و لما هتدخل فى علاقة مع الشخص الصح هتقدر تحب و تعطى يمكن بشكل أفضل و متزن أكتر لو أتعلمت من اللى فات.
لأن السر كان فى قلبك من البداية هو اللى حب و هو اللى هيقدر يحب تانى ❤️
و عقلك أتعلم هيقدر يوزن لك حبك عشان يكون لك مش عليك
فى العلاقات مفيش طريقة تعامل ثابتة و واحدة للجميع.
كل شخص بنتعامل معاه له معادلة خاصة طريقة التعامل معاه بتختلف عن الآخرين.
فى أشخاص معادلتهم بتحتاج حزم و وضع حدود بزيادة غير كده ممكن يحدث إستغلال أو تعدى.
فى أشخاص معادلتهم بتحتاج إننا منسمعش ليهم كتير من كتر شكواهم لأنهم بيستنزفوا طاقتنا.
فى أشخاص معادلتهم بتحتاج نقلل دعمنا و مساعدتنا لأنهم بيتحولوا لأعتماديين و بيرموا المسؤولية علينا.
فى أشخاص معادلتهم بتحتاج كلام لين أكتر لأنهم بيجلدوا ذاتهم و محتاجين رحمة أكتر.
فى أشخاص معادلتهم بتحتاج معاملة سطحية لأن الدخول فى علاقة عميقة معاهم بيدخلك فى مشاكل أنت ملكش علاقة بها.
فى أشخاص معادلتهم بتحتاج حرية أكتر لهم لأن ده إحتياج داخلى ليهم.
يعنى فى العلاقات فى ناس بتحتاج رشة حزم و ناس تانية رشة حب و ناس ثالثة رشة فلفل أسود 😅👌
معادلة كل شخص ممكن تختلف بتغيره و التغير ممكن يكون للأسوء أو الأفضل.
معادلة كل شخص ممكن تتغير على حسب الفترة اللى بيمر بها.
معادلة كل شخص مش كلها هتكون مناسبة لنا فى أشخاص معادلتهم سهلة بالنسبة لنا و بنستمتع فى التعامل معاها و فى معادلات صعبة و معقدة و مستنزفة.
المهم و أنت بتتعامل مع المعادلات كلها أعرف المناسب و الغير مناسب و أستخدم الرشة المناسبة مع كل معادلة.
و دائماً أشتغل على أن معادلتك تكون معادلة متوازنة و سهلة و لينه.....
بس خلاص 🖐️
ليست هناك تعليقات:
إرسال تعليق