جريدة ألماس الشرق _ صاحب نفسك من غير زعل _ بقلم الكاتبه / أمل فهيم أحمد

                    صاحب نفسك من غير زعل

فجأه بتلاقي نفسك .. مش قادر ولا عارف تفكر .. ولا فاهم همشي 

فين

 إزاي 

وليه

فجأه تلاقي نفسك .. مش فاهم ولا عارف تختار ولا قادر تختار و لا حابب تختار .. انت ساكت و بس

 لا سامع 

ولا عاوز تفهم

ولا حابب تستوعب الأحداث

أوقات كتر التفكير بيوصلك لمرحله عدم استطاعتك علي التفكير اصلا ..

مرحله السطحية  .. انك مابتقدرش تتعمق في الأمور ولا تبحاول تفهم أكتر من اللازم 

مرحله انك بتكتفي بالوش الظاهري اللي بتشوفه من الناس 

مرحله عدم البحث عن الحقيقه ..

مرحله "يالا بينا نمشي" يالا نعدي 

أوقات بتكتشف أن محاولاتك  الكتير اوي علي فهم واستيعاب الأحداث والناس ارهقت نفسك وقلبك و عقلك 

أوقات بتكتشف أن ماهما عملت وجريت مش هتوصل للكمال 

ومهما حاولت تبقي كويس مش كل الناس هتحبك

هتوصل لمرحله تتقبل فيها أن  ناس من اللي عرفوك هيكرهوك .. ناس مش هتحب تتعامل معاك ومش هدور علي السبب هتتقبل كره الناس بكل اريحيه و تفهم وهتبرر كمان ليهم دا لان ببساطه مفيش حد كل الناس بتحبه ولا حد كل ناس بتكرهه

مرحله انك تقدر كل حد بيحبك و عرف يشوفك صح بكل النواقص اللي عندك و المميزات اللي تمتلكها حد شاف فيك الحلو والوحش وقيمك صح واختارك علي صورتك الحقيقيه مش الصوره المهزوزه أو الصوره المشوهه 

هييجي عليك وقت هتعرف تبقي مبسوط من غير ماحد يبسطك

هتعرف تهتم بنفسك من غير ماحد يهتم بيك 

هتعرف تقبل اللي مش عارف تعمله و اللي نفسك تعمله ومش قادر واللي مش عندك واللي مش هتقدر أنه يكون عندك كل دا هتتقبله بهدوء و طمأنينه وهتقدر انك مش سوبر هيرو ولا سوبر مان علشان تعرف تعمل كل حاجه وإن احنا في دونيا النواقص وماحدش هيعرف يعمل كل حاجه ولا يكون عنده كل حاجه 

الحياه ابسط من انك طول الوقت تلوم نفسك ع تصرفات الناس معاك 

أو تلوم نفسك ع كره بعض الناس ليك 

ولا تجري ولا اللي مش هتقدر عليه 

الحياه خد وهات 

مكسب وخساره 

حب وكره 

 وفي الاخر اهي دونيا وبتعدي ..