(راجع ليه؟!)
**************
ليه سيبتنى وانت بتهوانى؟؟
دا انت ما غبتش عني ثواني
انا لو حبي اتملك منك
كنت نسيت الدنيا عشانى
جاى بتقولي تعالي نعوض
ماضي اهو عدي ومر وفات
بعد العمر دا كله وراجع
جاي تسقيني المر كاسات
دا انت كلامك صعب وواجع
شايفينه الخلق علي شاشات
راجع تاني تقول سامحيني
وانسي الآمي ومر سنيني
مش عايزه منك سلامات
قلبي شبع اوجاع وآهات
بعد ماكنت اتنفس حبك
بافعالك خلص اللى مابينا
والقلب اتحول لرقات
بعد العمر ماولا وراح
راجع تملى الكون افراح!
عشت سنينى مابين
اوجاع
بعد حبيبي ماسابني وباع
ماتت فيا كل مشاعري
مابقاش فاضل غير أشجاني
بسهر ليلى وبكتب شعرى
وانت مادارى بكل مشاعري
برسم ضحكه على الخدين
بس الدمع ملاه العين
عيشت ليالي كتير اناديلك
بأتمنى تضوي بأناديلك
كنت بناجي الليل وشجونه
وأبعتلك نجمه تغنيلك
كانت روحي تروح وتسيبني
وأسأل فينك ولا تجوابني
وجعك في أيامي وف سنينى
بعد ماقولت خلاص انسينى
ونسيت إنك واخد روحي
ولا عمرك بتداوي جروحي
وبعد دا كله راجع تاني!!
بتخربش زمنك وزماني!!
إبعد عني وروح ياأناني
اه لو يرجع بيا زمانى
كنت نسيت حبك فى ثواني
راجع ليه... راجع ليه؟!
ليست هناك تعليقات:
إرسال تعليق