جريدة الأسرة العربية _ هبه فتح الله في حوار مع الفنان المبدع رحماني الشيخ مصمم الاميجرومى

معانا فنان قدر يكسر التقاليد المتعارفة ،قدر يجسد بإبرته اروع الاحاسيس الفنية فى عروسة الاميجرومى.

عبد الرحمن محمد محمد او زى ماهنعرفه رحمانى الشيخ مؤسس صفحة amigurumi By Rahmani لشغل الاميجرومى على facebook.

رحمانى عمره ٢١ سنه من الاسكندرية فنان موهوب متعدد المواهب رسام ،مبدع فى الاعمال الخشبية، مصمم ازياء ، ممثل مسرحى ، واخيرا من افضل مصممى الاميجرومى فى مصر .

رحمانى حكايته غريبة وبتشاركه بطولة حكايته والدته(رحمها الله) هى اللى زرعت جواه الابداع وشجعته من صغره.

رحمانى من تانية ابتدائي كان بيحب يشوف والدته وهى بتبدع فى اشغال الكروشية وتقريبا والدته من اول مصممى الاميجرومى فى مصر من حوالى ١٣ سنه كانت بتشتغل مجسمات الطيور.

من جمال شغلها اتعلق رحمانى بشغل الاميجرومى وساعدته والدته على كسر اول عقبة فى شغله انه ولد ازاى يشتغل كروشية بالعكس كان عمره ٨ سنين اول ماوالدته ابتدت تعلمه مسك الابرة والغرز الاساسية واحده واحده.

مافكرش  بعد كده يشتغل اميجرومى تانى لغاية فبراير ٢٠١٩ شاف فيديو على اليوتيوب لعرايس الاميجرومى وساعتها عجبته فكرتها جدا وابتدى يعلم نفسه ويطور موهبته من فيديوهات اليوتيوب .

لحد مااتعرف على الاستاذة /رانيا المصرى من اشهر مدربى الاميجرومى وهى اتبنت موهبته واتعلم معاها كتير جدا وبينسب ليها نجاحه فى مشروعه.

وابتدى مشروعه من فترة قريبة ...لكن...تاتى الرياح بما لاتشتهيه السفن .!!! والدته (رحمها الله) اتوفت ٢٥/١٢/٢٠١٩ وزى ماعرفنا انها الداعم الاساسى ليه وكان هيوقف الشغل لكن رجع لموهبته وشغله تانى .

رحمانى فعلا فنان موهوب وبيتقن موهبته جدا .

قدر يدخل مجال صعب للشباب ويكون من اول واشهر الشباب فى مصر فى شغل الاميجرومى.

قدر يطور موهبته قابل صعوبات ولسه بيقابل لكن ايمانه بالله وحبه لموهبته داعم قوى ليه.

من اجمل العرايس اللى شفتها لرحمانى عروسة الفنانة بدرية طلبة جميلة جدا بتفاصيلها .

باذن ربنا نكتب المقال الجاى مع رحمانى بعد مايسجل براند لشغله.

هبه فتح الله