"لغات الحب الخمس للاطفال "
قبل ما نبدأ نتكلم عن كل لغه حب في شويه حاجات لازم كلنا نفهمها ونتفق عليها الأول
1- يعني أيه لغه حب 😲 :-
يعني طريقة فهم وترجمة أبنك للحب اللي بيستقبله من اللي
حواليه وطبعاً الأهم بابا وماما .
2- أبني عنده لغة حب واحده ولا أتنين ولا كام..... 😩
أبنك عنده الخمس لغات ولكن في لغه واحده هي الأساسيه والأهم وباقي اللغات ثانويه بيحتاجها برضوا بس بشكل أقل .
طيب نبسط الموضوع شويه عشان كلنا نفهم .
هما "خمس طرق" او "خمس لغات " بس للحب مافيش اي طرق تانيه
" طيب تمام" 👍..
أبنك بقا في طريقه من الخمسه هي المهمه عنده اوووي ودي حسب طبيعة وشخصية كل طفل والأربعه الباقين بالنسباله بيأكدوا بس حبك ليه
"طيب كويس برضوا 👍"....
طيب فين المشكله بقا 🤔
المشكله لو انت مش عارف اللغه الاولي والمهمه عنده وبتتعامل معاه باي لغه تانيه فهو مش هيكون واصله اي حاجه من حبك للأسف وهيكون عنده مشاكل سلوكيه ونفسيه كتير جداً 😔
طيب وأزاي أعرف لغة حبه الاولي 😭
هنعرف مع بعض الخمس لغات وهنحدد الطرق اللي هنعرف بيها لغه كل طفل الاولي (الاساسيه ) من الحلقه القادمة "لا تقلقوا " 😍
*طيب ناخد مثال من الواقع عشان الموضوع يثبت اكتر شويه 😂
****اولادنا عاملين زي العربيه 🚘 ماينفعش تمشي من غير ما البنزين (لغه الحب الاساسيه ) يكون مالي الخزان ( خزان العاطفه ) والعربيه بتحتاج برضوا مياه وزيت و صيانه..... كل فتره (دي باقي اللغات ) عشان تكون عربيتك تمام وتقدر تتحرك بيها وانت مش قلقان لازم تطبط كل حاجه 😉 *****
(كلام موزون برضوا )😀
3- لازم نفهم أننا لما نعرف لغة حب أولادنا ونتعامل معاهم بيها دا مش معناه أن خلاااااص كل مشاكل أولادنا اتحلت وسوف نعيش في أمان وسلام.. 😆
لأ خااالص ابسولوطلي 🤓
دا معناه انك هتربي طفل عنده
-ثقه في نفسه وفيك ,
-يشعر بالأمان والأحترام ,
-يشعر بالمسئوليه لأن خزان العاطفه ( الوقود ) عنده مليان ودا معناااه أن طفلك بعيد تمام البعد عن أغلب المشاكل النفسيه و السلوكيه زي العنف التنمر الادمان السرقه .......
*** العباره دي ياريت تكون قدامنا كلنا طول الوقت " الطفل الذي يشعر أنه محبوب وأنه محل أعتناء هو فقط الذي يستطيع أن يقدم أفضل ما لديه "
4- طيب أيه الفرق بين" الحب المشروط " و"الحب غير المشروط " 🤔
(ايه دا كمان 🥱 )
(لأ صحصح معايا كده 🥳)
الحب المشروط :- هو أني أوصل للطفل أني بحبه لسبب ما (أنه مثلا بيسمع الكلام) مش لشخصه هو ( مش عشان هو ابني وجزء مني ومهما عمل مقدرش أكره او حبي ليه يقل ) فيحس أن حبك ليه مربوط بشروط ولو الشروط دي مابقتش موجوده حبك ليه مش هيكون موجود برضوا
( زي مثلاً)
-ذاكر عشان أحبك
- خلص أكلك كله عشان أحبك
-أقعد هادئ عشان أحبك
وغيرها اااا
أما" الحب غير المشروط " :- هو أني بحبك لشخصك بغض النطر عن شكلك او تصرفاتك او كلامك او إمكانيات او عيوبك او اي حاجه أنا بحبك وهفضل أحبك مهما عملت ......
(لأ براحه كده عشان انتي كده قلبتلنا دماغنا 😏 )
(طيب حاضر اني اسف 😁)
لو عرفت لغه حب أبنك دا لوحده مش كافي لازم تعرف معاها ازاي هتوصلوا الحب دا وازاي يصدقك صح
دا بقا عن طريق الحب غير المشروط يعني حب وعطاء بلا أنتظار لمقابل
مثلا لو هو عنيد شويه لازم يبقا عارف أننا بنحبه وهنفضل نحبه بغض النظر عن أختلافنا معاه في موضوع العند وأن رفضنا لسلوك العند فقط مش رفضينه هو كشخص
فيبدأ يتقبل مننا الكلام لأنه هيكون متأكد ان رغم اي أختلاف احنا هنحضنه وهنبوسه وهنلعب معاه وهنديله كل اللي بيحتاجه من حب وأمان و....
ودا ينقلنا للنقطه ال
5 - هل لو انا اتعاملت مع ابني بلغه حبه و بالحب غير المشروط كده مش هيكون دلع زياده او ممكن افقد شخصيتي معاااااه
(انا كأمنيه اتفجئت الصراحه من السؤال 😳 )
(لأ طبعا عزيزي ألاب وعزيزتي الام )
هيكون في عقاب طبعا علي التصرفات المرفوضه بس بشرطين
-هنبدأ نعاقب بعد ما نملأ " خزان العاطفه " الاول علي الاخر 🤗
-ونبعد تمام البعد عن اننا نوصله اننا مش بنحبه احنا بس رفضين التصرف الخطأ اللي هو عمله "الحب غير المشروط " 😍
وفي مقال كامل ان شاءالله هنتكلم عن طرق العقاب بس بعد ما نعرف ونفهم ونحدد لغه حب كل طفل
6 - اخر حاجه بقا ممكن مخك يرفض تصديق او التعامل مع ابنك بطريقه لغات الحب غير المشروط لان دي ممكن تكون عكس معتقداتك وخبراتك بس احنا مع بعض هنبدأ نغير معتقدتنا وخبراتنا واحده واحده عشان اولادنا يكونوا أفضل 💪
تعالوا بقا نلخص بسرعه كده اللي قولناه 😊
- ولادنا اطفال وهيفضلوا يتصرفوا بطريقه طفوليه ممكن تكون مزعجه لينا احنا
بس لازم نفهم انها مرحله وهتعدي
- لو قدرت اوصل حبي بالطريقه الصح ومن غير شروط هتعدي مرحله الطفوله وهيكون عندي ابن لديه ثقه بالنفس ومعطاء و مسئول وهيكون عنده نظره ايجابيه عن نفسه وهيكون قادر يتحكم في سلوكه وقلقه في مرحله البلوغ
- اخر حاجه بقا لو حبتوهم بطريقه مشروطه وادتولهم الحب اوقات ما يكونوا كويسين بس كده هتدخلوهم في مشاكل سلوكيه كبيره جدا زي انعدام الثقه بالنفس وعدم الشعور بالأمان و عدم تحمل المسئوليه والتنمر والكدب والسرقه....... وهتشوفوا ايام ما يعلم بيها الا ربنا ☹️
-احنا هنعرف ما بعض كل ما يخص لغات حب اطفالنا منذ لحظه الميلاد وحتي مرحله المراهقه في الحلقات القادمه
ولازم كلنا نفهم ان كل ما كانوا اولادنا اصغر في السن هيكون اسهل علينا اننا نملأ خزان العاطفه عندهم اسرع واسهل ان شاءالله . 😊
- لو عندكوا اي سؤال يخص مقال انهارده اكتبوه في الكومنت وهرد عليه 😊
ليست هناك تعليقات:
إرسال تعليق