حدوتة لماما❤️❤️❤️
كان ياما كان ياسادة ياكرام ولا يحلى الكلام الا بذكر النبي عليه الصلاة والسلام.....
في يوم من الأيام كان في ولد جميل طلب من ماما إنه نفسه يتكلم معاها شوية؛ لكن من غير خوف...
وافقت ماما ووعدته إنها مش هتزعل من كلامه.
وبدأ الولد بكلامه وقال:أنا وأصحابي عندنا كلام كتير نفسنا نقوله لأمهاتنا بس خايفين نزعلكم.
ماما أنا بحبك جدََا وعارف إني كتير بعمل تصرفات مش صح لكن للأسف انا معرفش إنها مش صح أنا طفل صغير بستكشف كل شيء حواليا، المفروض حضرتك تفهميني الصح من الغلط وتنصحيني من غير عقاب...
أنا وأصحابي هنتعلم إزاي من غير مانغلط؟!
أنا وأصحابي نفسنا جدََا دايمََا نسمع ونعرف إنكم بتحبونا، نفسنا تحضنونا أكتر ما تضربونا أو تعاقبونا.
نفسي لما أعمل حاجة غلط آجي أحكيهالك من غير خوف من عقاب، نفسي أحس إنك بتسمعيني وحتى لو غلطان أكون واثق إنك هتنصحيني بحُب...
ياماما أقولك على سر!
لما بتيجى تضربيني أنا بس بشوف تعبيرات وجهك لو بتضحكي بفهم إنك بتلعبي معايا وبضحك، ولو زعلانة بفهم إنك بتعاقبيني؛ لكن الضرب أول مرة بس بيوجعني لكن بعد كدة خلاص بتعود عليه...
ياماما الضرب بيحسسني إني مش إنسان وبفقد إحترامي لنفسي؛ وحضرتك دايمََا تقوليلي إني إنسان وربنا كرمني عن باقي المخلوقات....
ياماما أنا بحبك أكتر من أي حد في الدنيا نفسي تفهميني وتخصصيلي من وقتك شوية صغيرة اتكلم فيهم معاكي عني أنا وأحكيلك على يومي بصراحة من غير خوف، نفسي تسمعيني بإبتسامة وتحسسيني بالأمان بحضنك حتى لو غلطان إنصحيني بحُب...
ماما آسف لو كلامي ضايقك بس نفسي أكون مش خايف وأنا بحكيلك كل تفاصيل يومي......
ماما كانت بتسمع الولد الجميل بتركيز كبير جدََا وبعد ما خلص كلامه حضنته جامد وإعتذرتله إنها مكانتش فاهماه ووعدته إنها هتنفذ كل كلامه ❤️
وتوتة توتة خلصت الحدوتة وإستنونا في حدوتة جديدة مفيدة من حواديت ماما شيمو
جميلة يا شوشو مبدعة دائما
ردحذفتسلمى يا جميله
ردحذف