مسحراتي ٢٠٢٠ ( الحجر المنزلي) 1
_______________
مسحراتي وماشي في البلاد رحال
المشي طبعي .... والدق على طبلي
واللي قبلينا قالوا ف الأمثال
الرجل تدب .... مطرح ماتحب
وأنا دبيت .. وحبيت .. في كل مكان
مشيته وما خليت
ودلوقت قال منعوني من التر حاااال
وانا قلت ليه يا اسيادنا بس وقف الحال
قالولي علشان سلامتك خليك ف البيت
يومين ثلاثة وربك يصلح لنا الأحوال
كورونا طبت علينا ... عماله تنقي وتحصد فينا
من غير إحم ولا دستور
قفلوا المساجد والاذان بصوت حزين 😔
أيام صعبة وبتعدي على البلاد بالدور
فيروس ملعون ... يخلي النفس ف الصدر مسجون
لا له دوا ولا منه المريض بيشفى إلا بأمر الرحمن
في كل بلاء طاقة نور ورحمة من الوهاب
في عز الشدة شُفنا بعنينا العجب العُجاب
الكل أمن برب الكون الخالق الديان
وعرفنا قدرته وصاحب الملك والأكوان
ورفعنا أيدنا للسماء نطلب العفو وأقرينا بالذنوب
وطلبنا الرضا والإحسان
أصحى يا نايم وفتح عينك يا غفلان
اصحى وحد الديان
بكل لغات العالم لجئنا لك يارب العالمين
تسبقنا ذنوبنا وذلة النفس المكسورة
آه يا كورونه طلعت عنينا وعين اللي جابونه
شتتي الصحاب وفرقت بين الأحباب
بقينا خايفين على بعضنا بالايد نسلم
قعدتي الكل في البيت والأخرس اتكلم
بقى فيه بين وبين بعضنا حوارات
نفتكر أيام زمان ونتصعب على اللي فات
يا كورونا والله عملتي خير فينا
جمعتينا وببعض أنستينا
والتليفون والنت وانشغالنا بنفسينا ... نساتينا
وحب البيت ولمة العيلة زي زمان
وجانا رمضان شهر البر والاحسان
مش زي عوايدة باين عليه زعلان
شهر في العام كان بيتساوي فيه الغني مع الغلبان
لفعل الخير بيتسابق ويتقل في الميزان
جيتي يا كورونا على الفقير الشقيان
كان بيسعى على لقمة عيشه ويفطر
على موائد الرحمن
حرمتيه منها ومنعتي عنه الرزق كمان
لكن ربنا عالم بحاله مش هيقضي ليله في احزان
إلى اللقاء في حلقة جديدة من مسحراتي ٢٠٢٠
ليست هناك تعليقات:
إرسال تعليق