نَزّْ العسل منَّك
حلَّى السما والأرض
دايرة تطوف
والجن ماسكه
دفوف
بتدُق باب السَّعد
لابسة النجوم فساتين
وعليهم الطرحة
ملياهم الفرحة
اطوحوا ف حضرة
بتوب البراح
ماسكين
حاوطتهم القدرة
اتسبحوا بأنين
فاتجلت السدرة
طبيت بين الساجدين
مجذوبة
م السكرة
فوق ف الفضا مكتوب
اللى شافك هايدوب
يغزل حروف الوِرد
والرب جَد غفور
والمد طاقة نور
مالية بحارى الحور
حافظة معانى الود
وانا قلبى طاير طير
حامل بشاير خير
عصفت بيه المشاوير
خايف يدوق الصد
آه يا لُقى القلبين
إمتى وأشوفك فين
إمتى يجينى الرد
أنا تايهة بين شطين
مجدافى تاه منى
والموج مخايلنى
يا مين ينادى المجد
يغزلنى توب أبيض
ويرصَّعه بالورْد
أنا حرة بس هويت
ولا عمرى مرة هويت
ولا رجلى غاصت
طين ..
أنا من أهل
الهوى ..وأهل الهوى
مساكين ...
ما يحس بيهم حد .
.
ليست هناك تعليقات:
إرسال تعليق