عندما يكال الفن بالباذنجان ...بقلم / نرمين نبيل ‏

مع أشراقة و ابتسامة تعلو وجهي دائما ادخل فصلى كل صباح ، و لمن لا يعرفني فأنا شخصيا اكره النكد ولكنى مع الأطفال في نهاية اليوم تبعد عن وشى ساعتها و انسى أنني مُعلمة !!


 فى نهاية اليوم اجد نفسي اقتنع بمقولة بالزعيم الراحل سعد زغلول الذي قال ( مفيش فايدة ). •
 و لاني مُدرسة فمن الطبيعي أن اتحدث عن مدراس الفن مع الطلاب و هناك طرق تدريس مختلفة و لكنى احب طريقة العصف الذهنى لأنها تفتح حوار بينى وبين الطالب حتى اعرف ماذا يدور برأسه و أتجاوب معه ، و غلطت و سئلت ما هو الفن وما قيمته لدى الإنسان؟! •

 عارف حضرتك إجابة سعيد صالح لما اتسأل سؤال عن المنطق؟ كان فيها الرحمة عن ما سمعته. • *سؤال : حد يقولى يا أولاد ما معنى الفن التشكيلى ؟ ( ها ..... ) ( يا ميس احنا فحصة رسم مالنا احنا ومال الفن التشكيلى !!) * بارد بكل هدوء و انا اعذرهم . حبيبي الفن وسيلة لخروج الافكار والمشاعر التي بداخلنا باختلاف الخامات بدءا من الورقة حتى الحجر و علينا التعبير عن اتجاهاتنا للوصول إلى أفضل صورة. ( ايه يا ميس الكلام الكبير ده !) ( احنا بنرسم العيد و الاهرامات بالعافية تقولي لينا فن تشكيلى و تحكيلى !! ) * ياسلام على الرد… * اتحدث عن (ڤينسنت ڤان جوخ) كمثال فهو طفل تربى في أسرة دينية بهولندا ولديه أخ أكبر رسام تأثر به ثم بدء يبيع لوحات اخيه الاكبر فالشوارع و عندما كبر اتجه إلى التصوير الفنى بسكينة اللون و انحسرت حياته القصيرة بين الفاتح والغامق فى اعماله الى ان أصاب بنوبات مرضية ( صرع ).... أدت إلى أنه قام بقطع أذنه ثم مات منتحرٱ فى احدى مستشفيات الأمراض النفسية عن سن ٣٧ عاما. وبعد؟

 إقرأ معى التعليقات التي انصهر قلبى منها : - ( وكان بيبيع اللوح بكام يا ميس) ، - ( وكان بياخد سمسرة على لوحات اخوه ولا كان بيضحك عليه ) - ( وهو كان شغال عند اخوه خدام ) - ( ودلوقتى لوحاته بتتباع بكام ) - ( ومات منتحر ليه كده مات كافر) - ( و قطع ودنه ده اهبل ده ولا ايه) - ( يا عم سيبك انت بتقولك بيلون بسكينة المعجون أصله كان نقاش) * لا يا حبيبي سكينة لون دى رفيعة بيتلون بيها طبقات لون مثل النسيج اللونى ... -(يا ميس هو بتاع سجاد ولا رسام ) * لا يابنى رسام انا اقصد سكينة اللون دى مخصصة للرسم ... ( يعنى بتعور) ؟

 لا مش بتعور .... - ماشي يا ميس بتزعقى ليه ! * و لما عرضت عليهم اشهر لوحات ڤان جوخ لوحة Poppy flower زهرة الخشخاش أغلى لوحة لڤان جوخ .. اتفتح فرع تغير عملة داخل فصلى ، والأولاد حسبوا قيمتها على سعر الدولار حسب توقيت السوق السوداء .

 و لما شافوا بقية اللوحات ‏- عن لوحة( اكلى البطاطا) . ( حمرا ولا صفرا ، هات حتة من اللوحة اكلها يا صاحبى ...باعها بالكيلو ولا بالوحدة) - ‏لوحة فروع شجرة اللوز المزهرة.... ودى كان بيزرعها فى شهر رمضان) ليه هو ڤان جوخ بقى بتاع قطايف؟؟ . -

 أي جيل هذا الذي لا يقدر القيمة و القامة؟ فقامته انحصرت على اغانى التكاتك والهاتش والنتش. وقيمته أصبحت معاك جنيه تسوى جنيه. افتحوا عيون اولادكم، اجعلوا قيمة للأنشطة سواء كانت فنية او موسيقية أنها تسمو بالروح وتنقى النفس وتفتح مدارك الاطفال و اسمحوا برحلات مدرسية الى المتاحف لتوسيع أفق وثقافات راقية قد يتغلب تيار الانحدار إن أهملنا الثقافة والفنون. علموا اطفالنا كيف نرسم وردة جميلة وبنت اجمل و ولد له مستقبل منير . اطفالنا هم براعم وزهيرات المستقبل ، لا تتركوهم للعبث.