تسعير مشغولات الكروشية شغل الهاند ميد وخصوصا الكروشية فن راقى جدا. وفى فنانين كتير عندهم مواهب رهيبة لكن مع الاسف بنعمل غلطات فى التسعير بتوقف شغلنا او بيكون العائد المادى مش مناسب ابدا واقل
من قيمه الشغل وبيصيبنا بالاحباط . هنشوف مع بعض ازاى نسعر شغلنا وايه الغلطات اللة نبعد عنها:
طيب ازاى اسعر شغلى؟؟
اكبر غلطه بشوفها اضربى سعر الخيط×٣!!!!! دا كارثه وهنشوف ليه فى حاجات كتير بتحدد سعر القطعه الفنيه اللى بنشتغلها:
١-الخامات: جودة الخامات والخيوط اللى بنشتغل بيها واهم حاجه تكون مناسبة للقطعه اللى بنشتغلها .
٢-نوع وسمك الخيط: سمك خيط الحرير او الديفا مثلا غير سمك الهيمالايا بيج مثلا فماينفعش نحسب شغل البكره ٣٠ج كل ماسمك الخيط قل كل مامصنعيته زادت لصعوبته ولكثرة عدد امتاره ولصغر غرزته واجهاده للعين والايد ولصغر القطعه المشغوله به فهياخد وقت اطول. اما بالنسبة لخيط الكليم فبالنسبه لى كل مازاد سمكه كل مازادت مصنعيته لاجهاده جدا للايد.
٣-ساعات شغلك: دا وقت بتاخديه من بيتك واولادك وصحتك يبقى لازم تحسبى لنفسك وقت شغل كانك موظفه وتحطى لنفسك وقت للشغل بس تركزى فيه للشغل وبس من غير تليفون ولا الاولاد ولا التليفزيون وتحسبى لنفسك ساعه الشغل بكام مثلا حطيتى لنفسك ساعه الشغل ١٠ج الشال مثلا خد ٧ ساعات يبقى هنضيف للتكاليف ٧٠ج ساعات عمل دى حقك قصه
جميله قوى قريتها اول ماابتديت اسعر واعمل التسعير بتاعى : الرسام الرائع بيكاسو قابلته واحده فى السوق وطلبت منه يرسم لها صورة وفعلا فى ٣٠ ثانيه تقريبا رسم لها صورة خدته وشكرته ومشيت فنادى لها وطلب سعرها مليون دولار فاستغربت جدا وقالت له دى خدت منك ٣٠ ثانيه قال لها فعلا بس خدت منى ٣٠ سنه عشان اعرف اعملها فى ٣٠ ثانيه. يبقى نحط سعر لساعات عملنا الفعليه سعر معقول لانظلم نفسنا ولا نظلم المستهلك.
٤-الغرزة والالوان: كل نوع غرزة بيتسعر غير التانيه بمعنى فى غرز مجهده جدااا للعين وتفضلى تعدى الغرز طول ماانتى شغاله وفى غرز كلها كلها عامود ممكن مش تبصى وانتى بتشتغلى وكمان الغرز المفرغة غير الغرز المصمته. وكمان انا ممكن اعمل شال كله لون واحد او شله واحده مش بغير الالوان كل شغلى بنفس الشله وفى شال تانى مطلوب كل كام سطر هقص واضيف لون تانى فماينفعش نقول سعر الشالين زى بعض.
٥-الدقه والاتقان والفينش: عليهم عامل كبير جدا فى التسعير واى حد بيبعت لى صورة من النت اسعرها له مطلوبه منه بطلب منه صورة من شغله عشان اقدر اقيم درجه الدقه والاتقان والفينش صح الشغل متنضف صح .الاسطر بدايتها صح نهايتها صح.ايدها مظبوطه طول الشغل مش تشد شويه وترخة شوية.
٦-مصاريف تانيه: أ- الشحن: بضيف لشغلى مصاريف الشحن اللى شحنت بيها الخيوط او مصاريف المواصلات اللى استخدمتها لو بشترى بنفسى الخيوط. ب-الادوات:فى حاجه اسمها اهلاك الادوات بمعنى ابرة تتكسر ماركر ابر تنضيف كل ده بيهلك معايا . ج-النت: الباقات اللى بستخدمها عشان افتح فيديو لغرزة لموديل اطلع باترون اعمل جروب نت محتاج باقه. د-دا الاهم الصحه : انتى بتهلكى ايدك بتحتاجى بعد الشر مقويات اعصاب ولعينيكى قطرات مرطبه عشان الشغل فيتامينات لللعين لان دول اهلاكهم خط احمر دول لو مااهتمتيش بيهم اهم حاجه لقدر الله مش بيرجعوا لاصلهم ربنا يحفظكم. غلطات بنقع فيها: ١-انى اسعر اقل من المنافسين دى مش شطارة بالعكس بتحطى نفسك فى موضع شك من الزبون عن جودة خاماتك عن جودة شغلك بتقللى فرص ربحك للاسف. ٢-ماتحطيش نفسك مكان الزبون بمعنى البلوزة لو ٤٠٠ج ممكن انا مااقدرش اشتريها فهقلل من سعرى عشان الناس تشتريها . اللى انا مااقدرش اشتريه غيرى يقدر يشتريه . اتفقنا دا هاند ميد يعنى فن يعنى اللى يطلبه يبقى عارف قيمته. اتمنة اكون فيدتكم واستنونى الاسبوع الجاى مع مقال جديد فى دنيا الكروشيه مصممة ومدربة الكروشية هبه فتح الله
اولا تسلم ايديك ربنا يحسن ما بين ايديك يارب وثانيه كلام صح جداااااااا جدااااااااا
ردحذف