اعرف نفسك اولا... بقلم رحاب سلام

 مع بداية عام جديد بنبدا نحط خطط وأهداف السنه الجديده، لكن السؤال الأهم ،هل احنا عارفين نفسنا بالشكل الكافي اللي يسمح لنا نحط خطط وأهداف مناسبه لنا؟ عدم معرفتنا لنفسنا يشبه بالظبط ذي ما تكون
اشتريت سيارة جديده متعرفش امكانياتها ولا مواصفاتها.. هل السياره دي تستحمل تغير درجات الحرارة؟ هل تستحمل المطبات والطرق الصعبه ؟هل مزوده بكافه وسائل الأمان ولا لا؟ اهو ده بالظبط نفس الظروف اللي بنتعرض لها اثناء تنفيذ خططنا، لازم يكون عندنا المرونه اللي تخلينا نتكيف مع الأوضاع المختلفه ،لازم يكون عندنا من المتانه اللي تخلينا نستحمل الضغوط والمطبات اللي هنتعرضلها اثناء الرحله. لازم نعرف قيمنا، مبادئنا، اولوياتنا ،قدراتنا…. فقبل ان تفهم الآخرين، يجب أن تفهم نفسك، ومن اهم اسباب فشل حياتنا وعدم تحقيق احلامنا، هو عدم معرفتنا، احنا عايزين ايه؟ او احنا نقدر نعمل ايه؟ وبنكتفي وقت الفشل بتحميل الآخرين المسئوليه، وننسي تماما ان احد اسباب فشلنا هو عدم فهمنا لنفسنا او لقدراتنا. لو نظرت حواليك هتلاقي ان احنا متشابهين في كثير من الأشياء، لكن هناك ميزة تميز كل شخص فينا، الميزة دي هي بصمتك الفريده الغير مكررة، واللي أراد الله انها تكون دورك في الحياه، ولها خُلقت. دور جوه نفسك كويس واعرف ايه هي الميزة اللي ربنا ميزك بها، عشان تقدر توصل لهدفك وتحقق مراد الله منك في الارض. رحاب سلام