الكلام الطيب بقلم.شيماءأبوزيد

 كان ياما كان ياسادة ياكرام ولا يحلي الكلام إلا بذكر النبي عليه الصلاة والسلام. كان في مره ولد جميل اسمه وكان صديقه اسمه أمين أمين كان دايما يزعق ويتعصب ويزعل من أقل حاجه ويقول كلام مش حلو خالص
ماينفعش ولد جميل زيه يقوله. وكمان كان بيكلم الكبار بطريقه وحشه خالص وكل مايزعل من حد يشتمه ويقوله كلام مش حلو خالص . سليم جه في يوم وقالله ياأمين انت ليه بتتكلم بالطريقة دي .ليه دايما تشتم أصحابك. يرد آمين ويقول: هما بيضايقوني وبعدين مش دايما بأكون باشتم أو باقول كلام يضايقهم، ساعات بأكون بهزر بس. رد سليم وقال : ياأمين احنا ربنا خلقنا حلوين وكل حاجة فينا نضيفه وبعدين انت عايز لسانك يوم القيامة يشهد عليك انك كنت دايما بتقول كلام مش كويس ! ضحك امين وقال : ازاي يعني لساني يشهد عليا هو مش انا اللي هتكلم ازاي بأه يشهد عليا ؟! رد سليم وقال: طبعا هتشهد علينا كلنا ادام ربنا سبحانه وتعالى لأن ربنا قال في كتابه العزيز بسم الله الرحمن الرحيم ( يوم تشهد عليهم ألسنتهم وايديهم وارجلهم بما كانوا يعملون) صدق الله العظيم آمين قال :ماهو مش كل الكلام اللي بقوله وحش انا ساعات كتير باقول كلام حلو . رد ياسين وقالله:ليه مايكونش كل كلامنا حلو حتى سيدنا محمد صلى الله عليه وسلم قال (الكلمة الطيبة صدقة) صدق رسول الله صلى الله عليه وسلم رد امين وقال:ياه كل ده ! طب انا عايز اتغير علشان ربنا يحبني اعمل ايه علشان لساني يرجع نضيف تاني زي ماربنا خلقهولي ويشهد عليا اني كنت على طول باقول كلام حلو رد ياسين وقالله:(إن الحسنات يذهبن السيئات) يعني استغفر ربنا على كل حاجه وكل كلمة مش كويسه انت قولتها وخلي ذكر ربنا على طول على لسانك ولما تتكلم مع حد اتكلم باحترام قول حضرتك بدل انت واتفضل بدل خد واشكر أي حد يعمل معاك حاجه كويسه ساعتها كل كلامك هيكون كلام طيب وكلام كويس ومن يومها وأمين أصبح فعلا ولد امين ومؤدب ولسانه كويس وبيتكلم بمنتهي الأدب والأخلاق وخلاص نسي كل الكلام اللي كان بيقوله الأول وتوته توته خلصت الحدوته واستنونا في حدوته جديدة (حضرتك بدل انت ) (اتفضل بدل خد) (من فضلك لما اطلب حاجه من حد) (اعتذر لما اغلط)