🍦جرانيتا بالفواكه
من أشهر الجمل التى خلدها التاريخ هى ماسطرته العالمه الكبيره ( هيلين كلير ) 😑عندما ينغلق باب للسعادة، ابحث فوراً عن غيره ولانركز في الباب المغلق لفترة طويلة ..!! وتتلاهى عن الانتباه لذاك الذي انفتح من أجلك حتى ولو كان تافهاً من وجهة نظر الآخرين🤑
اى عندما تشعر بالضيق والتعاسه ابحث عن اى شىءيسعدك ولو لبضعة لحظات تقول كتب التاريخ ان الملوك والقياصرة قديما خلطوا الجليد بالفواكه واكتشفوا ( هرمون السعاده) المعروف حالياً (بالايس كريم ) ومن بعدها تم اكتشافه فى دول كثيره وتطورت صناعته وأقيمت له أكشاك لبيعه فى عواصم دول العالم وتطورت طرق تقديمه حتى مرحلة البسكوته
وكانت تلك هى نظرية عم توفيق(بياع السعاده) عندما ينتهى فصل الشتاء ينتهى عنده موسم بيع البليله الساخنه بالمكسرات البلدى والكتافه ويبدأ موسم الآيس كريم يدور الشوارع والحوارى بعربته الخشبيه المبطنه 🚛من الداخل بوعائين متداخلين. من الاستانلس ستيل يوضع فى الفراغ الذى بينهما. ثلج مضاف اليه ملح الطعام حتى لايذوب الا فى آخر النهار وينادى عم فتحى بأعلى صوته بنغمه متقطعه🗣 الأيس ....... كريم هنا وبمجرد سماع نداءه الجهورى نقفز من امام التليفزيون من فوق الكتبه من فوق الأسره نهبط مسرعين من اعلى الأسطح تاركين من نلهو به متجهين صوب ( البوك الجلدى الاسود ) التى تضعه أمىً بجوار رف الراديو لنحصل منهاسريعاً على ( الشلن ) دائماً كان الوقت يضيع فى الجدال والمنهاده مع امىً😇 التى تصر على ان أخذت مصروفى اليومى صباحاً وينتهى الجدل ويمر الوقت ليغادر عم فتحى حارتنا لحارة اخرى لنجرى خلفه فى الحوارى المجاورة متتبعين صدى صوته ويهدأ لهث انفاسناونحن ناخذ من يديه بسكوته ايس كريم المانجه لتعم السعاده مع اللحسه الاولى لقمة بسكوتة الآيس كريم نعم كان الوصول الى قمة الآيس الكريم هو قمة السعاده بذاتها وسأحنث اليمين والقسم الذى قسمته لأمى بانى لن أطالبها بمصروفى اليومى غدا واليوم وقد كبرت ولا احتاج الى قروش أمىً وجدالها سأبحث عن عم فتحى 🏃♀️فى اى مكان واشترى منه هرمون سعادتى عملاً بحكمة هيلين كلير بفتح أبواب اخرى للسعاده وياريت تعملوا إنتوا كمان كده اذا كُنتُم تُشعرون بالسعاده عندما تصلون الى قمة بسكوتة الآيس كريم فالمحسوب من العمر فقط هو لحظات السعاده🤸🏿♂️🤸🏿♂️🤸🏿♂️
استرجعوا معى لحظات السعاده 🎬عندما كان الراديو📻 يذيع هذه الاغنيه🎼📻 🎼
الدندورمة
دوق.. دوق
دوق الدندورمة
مصنوعة بذوق تروى العشاق
وتطفى الشوق
الدندورمة
اللى زعلان من كوبايتين
حالا حيروق من الدندورمة
وإن كان حران بعد دقيقتين
مضمون حيفوق
م الدندورمة
دوق دوق دوق الدندورمة
مصنوعة بذوق
بايدين توفيق الدندورمة
وانا فى نهاية الاغنيه أكون قد انتهيت من اخر لحسه😀😀ويأكل فى البسكوته....بالمناسبه انا اللى اسميت بياع الآيس الكريم توفيق عشان يمشي مع الاغنيه ⛄️☃️
حكاية الجرانيتا الاسكندرانية 🍦🍦🍦
حكاية شاب إسكندرانى جميل و طموح أتولد فى اول القرن ال 20 يعنى 1910 أو 1915 ....الشاب بدء حياته بالشغل عند خواجة إيطالي عنده محل ايس كريم فى بحرى ....
حب الصنعة وبقى شاطر فيها و الخواجة بقى معتمد عليه واعتبره زى ابنه ....وبعد فتره حب الشاب انه يستقل ويبقى عنده عمل خاص بيه ....راح للخواجة عشان يستاذنه ماهى دى كانت أخلاق الزمن ده الصنايعى لازم قبل ما يستقل عن أستاذه لازم يستأذن ....المهم الخواجة اتفق معاه انه يديله الجيلاتى يبيعه وآخر اليوم يرجع يديله الفلوس وياخد المكسب ....ووحده وحوش شوية فلوس اشترى بيها عدة وفتح مكان خاص بيه ....البداية كانت كشك خشب فى منطقة هادية وراقية وبعيدة
كشك خشب فى جليم جنب فندق كبير خمس أدوار ....
طيب ليه كشك خشب ليه مأجرش محل لأن منطقة جليم كان كلها سرايات لعيلة محمد على و بشوات وبرينسيسات وكان ممنوع يبقى فيه اى نشاط تجارى ....
المهم قرر انه يعمل نوع من الجيلاتى جديد لأن الجيلاتى لحد الوقت ده كان ياحليب يا شوكلاته ....
قرر يعمل جيلاتى لمون حاول كذا مرة وكل مرة ما يطلعش مظبوط لحد ما فى مرة طلع حاجة حلوة قوى شبه الجيلاتى لكن مش جيلاتى ....
وبدأ يبيعها فى المحل مرة يقول عليها جيلاتى ومرة يقول دندرمة المهم أن الزباين مبسوطين ....
وفى مرة خواجة ابهه وقف وطلب واحدة وقاله :
"خبيبى خلو البتاع ده اسمه إيه؟"
قاله والله ياخواجة قول عليه دندرمة قول عليه جيلاتى ....
قاله:" لا ياخبيبى دى أسمو جرانيتا موجود فى ايطاليا لما أروح أزور الماما بتاع الأنا فى إيطاليا باكله لكن انا اجريجى عشان البابا اجريجى ...."
هو حضرتك مين يا خواجة؟ قاله: "أنت ماتعرفنيش
انا جليمو نوبولو عضو المجلس البلدى ....وأول واخد سكن هنا سمو المنطقة جليم على أسمى ....أنت اسمك ايه خبيبى؟"
أسمى مهدى ياخواجة وعشان زيارتك دى من النهاردة اسمها جرانيتا ....
ويمر شهر والتانى وفى يوم مولانا الملك كان قاعد فى ترأس الفندق إللى عم مهدى فاتح الكشك جنبه ....بص مولانا لقى ناس كتير واقفة جنب الكشك ....إيه ده ياولد؟
ده واحد بيبيع نوع جيلاتى اسمه جرانيتا ....
نزل مولانا وراح على الكشك وطلب واحدة جرانيتا .... المشكلة أن مهدى مكانش عارف ان ده مولانا ولاحتى متخيل ....مولانا اعجب بالجرانيتا وعطا لعم مهدى جنيه دهب وده مبلغ كبير جدا فى الوقت ده ....عم مهدى تقريبا كان حيسورق مولانا وجنيه دهب يا بركة دعاكى يامه ....
وتمر الأيام و ناس كتير تحب الجرانيتا بتاعة الحاج مهدى
لكن كان فيه واحدة هانم وصلت معاها الحكاية لمرحلة الإدمان كانت مرات كبير الياوران بتاع الملك فؤاد الله يرحمه وعندها سراية فى المنطقة ....
سألته يامهدى أنت ليه مابتفتحش محل بدل الكشك؟
-ياهانم ما انت عارفة البلدية مانعة اى محل أو أى ترخيص
-ولو جبتلك الرخصة يامهدى
-من بكرة افتح يا هانم ....
والهانم ماتكدبش خبر وبتصلاتها تجبله الرخصة لا ومش بس كده لا تديله 3 بكيات جراج فى السراية بتاعتها عشان يعملهم محل وأهو يبقى جنبينا كل ما نعوز جرانيتا نجيب ....
وفتح عم مهدى اول محل فى منطقة جليم فى سراية الهانم
سنة 1938 ....
وتبدأ البلية تلعب و نجوم السيما يجوا ياكلوت جرانيتا من عم مهدى ....
عماد حمدى وشادية وفريد الأطرش وعمر وفاتن ....
وتمر الأيام وفى سنة 1948 يأجر محل أكبر من ست إيطالية إسمها مارى ويكبر عم مهدى و ينتشر ويبقى كل حد يجى إسكندرية لازم يأكل من جرانيتة عم مهدى ....
عيلة عم مهدى كمان بتكبر بيتجوز ويخلف والولاد تكبر ويساعدوا أبوهم ويبدأ المرحلة التانية للتوسع ....
وفى سنة 1970 يفتح محل فى المعمورة ماهى لسه فاتحة وكل ولاد الناس بيصيفوا هناك ....
فتح محل جنب فندق المعمورة بلاس كان الريس السادات والسيدة حرمه عندهم عربية بيتلز لبنى نمرتها 5555 كان لما يجى المعمورة فى الصيف لازم يضرب جرانيتا عم مهدى ....
النهاردة أحفاد عم مهدى هما اللى موجودين فى محل كله ذكريات الزمن الجميل و روايح إسكندرية الجميلة ....
روح الحاج مهدى جوة المحل ممكن تسمعها وهى بتنادى
جرانيتا للهانم جرانيتا للباشا ....
ليست هناك تعليقات:
إرسال تعليق