❤❤ جرح القلوب 💚💚
طال السهر
فى ضى القمر
والليل الغريب
مع الناى الحزين
أسمع المواويل
وامسح بالمناديل
دمعه على الخدين
سالت من العينين
مـوال كان بيقول
تانى ياليل ياعين
هانت عليك العين
تجرحها برمش العين
وقلبى داب فى غرام
حبك ومالوش أمان
وسهامك الطايشه
سابت هناك بصمه
بصمه ومش هاتروح
والقلب بات مجروح
بالجرح زاد دقـه
ويمكن دقـتين
جبت الطبيب يداوى
قال لى مش دقتين
هناك رمش تانى
غارز فى نن العين قلت أتارينى شايف
الصوره بقت صورتين
والجرح فى القلب غائر
مـحتاج له غرزتين
قلت إزاى أسـامح
وأداوى الغـرزتين
قـال لى تحب تانى
وتـنسى رمش العين
دور على شخص تانى
يحب نـنى العين
يصون قـلبك ويمسح
بكــفوفه الدمـعتين
دا الحب هَوَّ الدوا
ووصـفوه للإتـنين
والحب هـو اللى يمسح
بإيـده دمـع العين
يـمسك بإيده ورده
جايبها من البساتين
يهديها للى بيحبه
ومايجرحش ننى العين
والـقلب يِـخْلى سبيل
سهمين كـانو طايشين
ويـجى الطبيب من تـانى
يـشيل الغـرزتين
ليست هناك تعليقات:
إرسال تعليق