موهومه
انتي يابت موهومه
عشان من الحب محرومه
مفيش جواكي شئ تقوليه
مفيش وقت ومعدومه
هي
انت بقي،،، مالك
انساني مالكش دعوه
عشان هاروح لخالك
وامي هاتدعي دعوه
هوه
يابت ياهابله بصي
عارفه ايه اسمه حب
إلي يخليكي دايما
قلبك مش اي قلب
هي
حب ايه يااخويا
بحب امي وابويا
وليه برضه قلب
هوه
يابت بقولك مشاعر
وقلب وحب وجواز
وانا لو كنت شاعر
كنت حكيتلك عليه
هي
هاتحكي انا مروحه
انا كنت بجيب مطرحه
وامي هاتشد شعري
وليلتي هاتبقي سوده
هوه
مش قولتلك ياهبله
انا من قلبي بحبك
امك احكيلها عني
وانا امي هابعتها ليها
هي
انا معرفش الكلام ده
ولا اعرف اقول لحد
امي هاتضربني طبعا
انا بقولك بجد
هوه
يابت انا قصدي خير
انا طالبك للجواز
وهافرشلك حرير
والنمليه ازاز
هي
يااخويا سيبني اروح
ومالكش دعوه بيه
بتقول كلام يدوخ
وبترقص ليه عنيه
هوه
طيب روحي ماتخافيش
مشي ماتتلفتيش
وبصي دايما امامك
علي بيتكم ماتتأخريش
هي
تاني مالكش دعوه
انته مش ابويا
روح أنت وفارق
وسيبني امشي يااخويا
هوه
خلاص وطي صوتك
هامشى خلاص وافوتك
بس احكي انتي لامك
امي هاتجيلها بكره
هي
والله مش هاقول
باين عليك مخلول
اقولها تموتني
طب ده بقي معقول
هوه
طيب ياست البنات
روحي الوقت فات
وبكره لكم زياره
هاجيب جاتوه وحجات
هي
تيجي زي ماتجيش
بكره انا سارحه غيطنا
راحين ننظف حشيش
هوه
طيب خلاص مع السلامه
للشوق بيبان علامه
وانتي معاكي اعيش
ياناس هواها خدني
وغيرها مايلزمنيش
اروح احكي لامي
واقولها عليها
دي تبقي بنت جارنا
دايب في جمال عنيها
مش عارف ايه ياامي
إلي علقني،،،،،، بيها
ليست هناك تعليقات:
إرسال تعليق