...............أنا الطيب
هاتولي قلب ضد الكسر والتجريح
هاتولي قلب متدرب معاه تصريح
ف عز البرد يتِصَدر لأكبر ريح
يكون خالي من الإحساس
حجر أجوف حيطانه صخور
لا يعرف ضعف ولا يتقال عليه فرفور
يكون مطلي كمان أسود
ونفصل فولت عداده بلاه النور
هاتولي قلب متغفق وداخله رخام
يكون جامد لا يتشقق ولا يتهان
فلما الدنيا تحدفله الهموم ألوان
يكون قادر يرد القسوة بالنسيان
يكون وسط الشهور أمشير
تقيس صفحاته بالامبير
ورق جوه الخريف بيطير
لا يعرف شط ولا عنوان
أنا الإنسان أنا الطيب
فى وسط الخلق متعيب
ثبت حضور لكني برضو متغيب
عشان قلبي الحنون مربوط
وهو قلبه متسيب
كتير العيبه منه تفوت ف بتحمل
ما أنا قلبي بطبعه كيوت وبيسلم
بشوف حواليا ظلم كتير وبتألم
لذلك قبل ما أتكلم بلم الجرح وأتعلم
ف قررت إن قلبي يموت وأكوي ضلوعي ولا سلم
هوقف ضخ إحساسي
وأعطل نبض أنفاسي
هأكون جاحد أوي وأسي
وهفرم قلبي بمداسي
فبطلب قلب ليه جبروت
يشق الصخر بالتنهيد
يحارب ف السكات بالصوت
يكون شلال ف قلب وريد
ليست هناك تعليقات:
إرسال تعليق