جريدة الأسرة العربية _ " لغات الحب الخمس للأطفال " الحلقه الثالثه _ بقلم الكاتبة / أمنية رضا

               

"لغات الحب الخمس للأطفال " الحلقه الثالثه

ماما شكلي حلو !؟ 😇🙄

تاني لغه حب وهي :-

لغة " كلمات التوكيد "

-الطفل اللي لغه حبه كلمات التوكيد بيكون أكتر حاجه بتحسسه

إنك بتحبه هي الكلمات الإيجابية  والدعم النفسى بالكلمات والتشجيع طول الوقت.... 

نوضح بقا كل مرحله إزاي نتعامل معاها 😊

1/مرحله الرضع وما قبل المدرسه :-

  في  المرحله دي  نهتم بالنظره الحنونه  ، والصوت الهادى ، والإبتسامه  ، والعنايه الشخصيه بيهم ، مع التلامس الجسدي  🤱🏼👩‍👧‍👦👨‍👧‍👦

 وأول ما يبدأ طفلك يفهم الكلام نبدأ نستخدم كلمات وجمل تشجيعيه ،

زى : 

   "انا بحبك  "

 "انا بحب شعرك الجميل "

 "انا بحب لون عيونك  "

  وكلمات تشجيعيه  مثل

 -انت ولد نشيط وقوي  ،

- انتي بنت ذكيه وجميله  ،

-اولادي مهذبين ، اولادي هادئين

 ( حتي لو مش حقيقى 😂🤭)

ونهتم نقول  الكلمات دي على طول وأمام الآخرين في مختلف الأوقات والمواقف ونكررها علي مدار اليوم   ...

"يعني نتلكك كده عشان نقولها "

ولكن بعدم ارتباطها بأي سلوك 

تذكروا دائما  🧐

 "الحب غير المشروط "

2/مرحله الطفوله أو ما بعد المدرسه :-

الطفل بيكون محتاج يسمع منك كلمات تشجيعيه وكلمات حب بإستمرار ولكن خدوا بالكوا    الاطفال اذكياء جداً يعني  متعودش إبنك انك بتقول كده عمال علي بطال .. لأ اختاروا المواقف حتي لو بسيطه يعني لو بيتمرن مثلا قوله قد ايه كان لعبه  متميز ... كان مركز... كان........ 

لو ساعد أخوه الصغير أو ساعد  مامته .. اشكروهم وحسسوهم انهم عملوا إنجاز

المهم إختار مواقف وابدأ من خلالها سمعه الكلام اللي هو محتاج يسمعه ..

خلي بالكوا  .. 

 لو قولتوا الكلام عمال علي بطال هيعرفوا انكوا بتكدبوا وهيتحول الموضوع  لشكل سلبي عليه

*حاجه مهمه جداً الاطفال اللي لغه حبهم كلمات التوكيد ماينفعش خااالص اننا لما نتضايق منهم في أي  سلوك خطأ عملوه اننا نتعصب عليهم  او نتكلم معاهم بصوت عالي او نقولهم كلام جارح

لانك كده بتدمره حرفيا وبتهدم كل الكلام والمشاعر الإيجابية اللى وصلتها له  ...

 حاول تتعامل معاه بصوت  هادي  وتخلي بالك من الفاظك  كويس جداً ومتوصلوش اي صوره سلبيه عن ذاته..

مرحله المراهقه...

أهم حاجة في المرحله دي إننا نعرف إزاي نوجه أولادنا المراهق اللي لغه حبه كلمات التوكيد ...  مفتاح توجيهه بأنك توضحله أضرار/مخاطر/نتائج  القرارات اللي هياخدها بمنتهي الهدوء..

إبعدوا عن إنكم تأمروهم

لو لقيت  أي سلوك انت رافضه اقعد اتكلم معاه عن نتائج السلوك  داه هتوصله لأيه بطريقه عقلانية

نصائح عامه بقى  لأي مرحله

1- اختار إسم دلع للطفل يكون  خاص بيك انت لوحدك وتقوله  وانتوا علي انفراد

2-اكتبوا ورقه فيها كلمات حب وتشجيع وحطوها  علي علبه الأكل بتاعتهم وسريرهم وعلي المكتب وفي اي مكان بيستخدموه

3-ابعتولهم رساله او اتصلوا بيهم قوللهم انكوا بتحبوهم وكلمات تشجيع 

4- حطوا صور ليكوا مع بعض في اماكن تكون واضحه في البيت واتعمدوا تتكلموا عن الصوره قدمهم وانكوا فخورين بيهم

5-لو كنتوا  هتسفروا او هتبعدوا عنهم  فتره اكتبو لهم مذكرات فيها كلام حب وتشجيع يقرأوها يوميا قبل النوم

6-لو لقيته بيمر بوقت صعب او حزين قوللهم خمس صفات بتحبوهم فيهم

7- اعرف  طفلك حابب يكون أيه في المستقبل وكل يوم قوله  كلمه تشجيعيه  عن  هدفه وحلمه

8- لو ارتكب خطأ قوله انك عارف انه مكنش يقصد وتحدث معه بهدوء

9- قبل ما ينام او يذهب للمدرسه او النادي قوله انك بتحبه  وخليها  عاده كل يوم

10-اهتم بالأنشطه اللي بيعملها  وقولوا كلمات تشجيعيه خاصه بأدائه وقدراته وحسسه انك مهتم بيه