لو ابنك رد عليكي بطريقة غير محترمة قدام الناس بيكون قدامك حاجة من تلاتة :
١- اما انك تردي كرامتك و تعلميه الأدب قدام الناس عشان يتعلم انك ليكي احترامك و عشان طبعا شكلك , بس ده هيترتب عليه انك هتهينيه و
هتحرجيه
٢ - او انك تقولي جمل من نوعية شكرًا يا متربي يا مؤدب او لينا حساب في البيت و ده برضه فيها احراج ليه 😅
٣ - او انك مترديش عليه عشان متحرجيهوش و لا تقلي منه و تطنشي اللي عمله , بس ده برضه فيه اهانة و عدم احترام ليكي و كده ممكن يتمادي فيها و يكررها بالإضافة إلي ان الناس هيفضلوا يسخنوكي انك لازم تشدي عليه اكتر من كده ,و طبعا لما تروحي البيت رد فعلك هيكون اكبر من فعله هو . طيب ايه الحل ؟
اول حاجة هتطلبي منه انك تقومي تتكلمي معاه علي انفراد و لما تقعدي خدي كذا نفس عميق عشان تقدري تحلي الموضوع بهدوء و بعدين قوليله : شكلك متنرفز دلوقتي محتاجين نهدي عشان نقدر نتكلم بإحترام لما تكون مستعد قولي و خلال الوقت ده فكري هل تصرفه هو اللي فعلا ضايقك و لا شكلك قدام الناس ؟
حاولي تشيلي من دماغك نظرة الناس ليكي و فكري بعقل , ابنك اهم و لما يهدي اسمعيه بعمق بدون مقاطعة و تعاطفي معاه و اعرفي انه محتاج يتعلم مهارات ظبط النفس و اسأليه علي السبب اللي خلاه فعلا متعصب بالشكل ده و ازاي يقدر يحله المرة الجاية بشكل فيه احترام ليكي اكتر و ممكن لو التصرف ده بيتكرر منه كل مرة و مفيش فايدة اعملي اتفاق ان لو ده حصل عند الناس هتضطري تاخديه و تمشي بهدوء لان ده ممكن يسبب ازعاج ليهم و ان بيت الناس مش مكان مناسب لحل مشاكلكم طبعا الطفل تحت سن ٣ سنوات بتشتتي انتباهه فقط او اعرضي عليه حضن عشان يهدي و برضه لو بيفهم الكلام ممكن تعملي نفس الاتفاق اللي فوق البوست ده بكتبه بعد ما شفت ام كاتبة علي جروب ان ابنها تطاول عليها بالكلام قدام أصحابه و هي كان رد فعلها انها ضربته بالقلم علي وشه قدامهم و بتسأل الناس عن رأيهم ؟
و معظم الكومنتات كانت بتشجعها علي تصرفها , ميعرفوش انه عمره ما هينسي القلم ده 😢 الغضب بيوقف المخ عن العمل بشكل طبيعي و بنحتاج ننسحب و نهدي عشان نعرف نحل الموضوع بشكل عقلاني اكتر كام مرة حد فينا قال كلام او أتصرف تصرف وقت الغضب و ندم عليه تجاه أولاده ؟
و حقيقي رأي الناس فينا مش اهم من اولادنا , لان هما بينسوا و اولادنا مبينسوش. و افتكروا ان ليس الشديد بالصرعة , انما الشديد من يملك نفسه وقت الغضب 👌🏼
ليست هناك تعليقات:
إرسال تعليق