رأيك في نفسك مأثر عليكي ازاي!
🔘اخدتي شهادات كتير وعندك علم كبير ولسه مش حاسه انك عندك العلم الكفايه اللي توصليه!
🔘حد قالك افكارك مختلفه ومش تقليديه وافتكرتي انه بيتريق عليكي!
🔘هل اتقالك مره ايه الحلاوه دي وحسيتي انها مجامله مش
اكتر!
وكتير وكتير من الحاجات الايجابيه اللي بتتقالنا وبنفتكر انها مجامله او كذب لاننا مش مصدقينها اصلا.
لو بيحصل معاكي موقف من دول يبقي لازم تعملي وقفه مع نفسك!
وتسألي نفسك
أنا شايفه نفسي ازاي؟
⚪️لان رأيك في نفسك بيتبني عليه تصرفاتك واختياراتك وبالتالي نظرتك لكل امور الحياه
مثلا
تفكيرك انك مش حلوه بيخليكي تفقدي الثقه في نفسك وده بيأثر سلبا علي اختيارك للبس بتاعك ، وعنايتك بجمالك واهتمامك بنفسك وتحاولي تواسي نفسك( كله محصل بعضه يعني انا لو اهتميت هيفرق ايه!)
وده بيأثر علي حالتك النفسيه وكل ده وانت مش فاهمه ليه 😇(عشان معتقد بنتيه في خيالك)
⚪️احساسك ان العلم اللي عندك مش مهم ، مش هيملاه مليون شهاده متعلقيين علي الحيط
المهم احساسك ان عندك قيمه محتاجها غيرك.
⚪️احساسك ان افكارك عاديه زي اي حد من البشر هيمنعك من الابداع وانك تكوني مختلفه ومميزه .
شوفتي ازاي نظرتنا لنفسنا ممكن تدمر حياتنا😢
هقولكم مثال
انا دايما لما كنت بدرس حاجه كنت بقول لنفسي عشان اطمنها انا بدرسها عشان ابقي انسانه افضل وكفايه اني اساعد نفسي
طبعا الكلام ده عشان ابعد عن نفسي شبح المسؤوليه واني طالما بتعلم يبقي لازم اعلم
كل ده عشان ابقي جوه دايره الراحه بتاعتي
وعشان الخوووووووف
خوف من الرفض
خوف من كلام الناس
خوف اني معجبش حد
خوف من اني اغلط
ودي كانت نظرتي لنفسي بتخافي فبلاش
فلما ابتديت اطمنها واغير نظرتي لنفسي بكلام كله ايجابي ، وهدفي من اني اتكلم ومخافش
لان محدش بيختلف عليه اتنين ولا حد بيجتمع عليه اتنين
طمنت نفسي اني لما اتكلم هلاقي اللي شبهي اللي عندهم نفس الوجع اللي كان عندي
خليت الصوره اللي عايزه اشوفها اني اكيد هفرق في حياه حد بإسلوبي، بطريقتي، بكلامي، بأفكاري
بمزيج قيمي ونقط قوتي والحاجات اللي شكلت افكاري
بقت صورتي عن نفسي
انا مختلفه يبقي هخاف من ايه!
⚪️الوقت اللي هتصدقي وتأمني فيه بنفسك
الوقت اللي هيتغير فيه العالم من حواليكي
هيكون صفحه جديده من الافكار، المعتقدات، التجارب
⚪️وصدقيني لو كل الناس اجتمعت علي ثقافتك وعلمك وانتي مش شايفه ده
عمرك ما هتحسي ان اللي عندك كفايه!😢
يالا جيبي ورقه وقلم واكتبي✍️🗒
ايه اللي بتصدقيه عن نفسك سواء كان سلبي اوايجابي
امثله
-انا شخص ساعي للكمال
-انا مش منظمه
-انا مش بعرف اقول لا
-انا معنديش ثقه في نفسي
هتلاقي نفسك كتبتي خليط من المعتقدات السلبيه والايجابيه مع بعض
بصي علي كل واحده فيهم لو لقيتيها مأثره عليكي سلبيا
اسألي نفسك
هل انا لازم اصدق الكلام ده عن نفسي؟
الاجابه : اكيد لأ
يبقي محتاجه
اني ازرع صوره احسن عن نفسي بكلام ايجابي وبموقف ايجابي وبقرار ليه معني
كل ده فايدته ايه🤔
فايدته اننا نبني صوره ذاتيه افضل عن نفسنا عشان ده
هيفرق علي جميع قرارتنا
ليست هناك تعليقات:
إرسال تعليق