جريدة الأسرة العربية _ قول لي يابني ليه بتبني _ بقلم الكاتب / سيف عثمان

                            

  قول لي يابني ليه بتبني

والبُنَي من غير أساس

وليه يغرك كُتر مال

وفِ الهوا رامي الحبال

وليه تقول فيه ناس وناس

..........

مسنود وساند

غني وفقيرعمده وغفير

ملك أمير مدير وزير

م الكل واحد

.....

م الكل ساب إللي معاه

وخراب يا دنيا الخراب

م الكل شارك في الحياه

م الكل جارك في التراب

....

م الكل ساب وداب وباش

ولبس كفن وقطن وشاش

ودود القبر يوماتي يسأل

مين إللي جه ومين مجاش

ومين في خدمه ومين معاش

ومين دا إللي بيشوف طشاش

ومين علي عكازخشب

ومين بيحبي ومين مشي

ومين مشاش

.....

طاب قول ليه غرك غِناك

حُسنك بهاك ..طاب شوف وراك

منتاش ملاك

منتاش قارون ...منتاش قانون

حتي قارون صابه الهلاك

.....

طاب ليه متخدشي الدنيا عادي

بلاش صريخ بلاش زعيق

وتبقي هادي

ولجل الأمان في الآخره حن

مش واد مشاغب لافحُه جن

تنزل علي ركَابَك لامك وابوك

بوس الأيادي

.....

تحب دايما ليه النفاق

وتدعمه بمليون طلاق

ودايما لسانك..جاب عسل

جايب دهان للسير.

لجل يجري بالعجل

تطلع تفط من مكتب لمكتب

لجل تعلا وتعلا وتعلا

بالنفاق مش بالعمل

.......

وكمان تدوس ع إللي

قطم ضهره الشقا

ومن كتر وقْفُه ف الطبور

من كتر حَفْره ف الصخور

إيده وارمه مفأفأه

حياته أيله للسقوط

متصدعه ومشققه

....

إنت عارف مهما تِعلا

ومهما الدنيا تروق وتِحلا

وأبراجك دي

تنطح في السحاب

كله في الآخر سراب

.....

وظل زايل والحاجات مسترجعه

م الأساس مضروب يا صاحبي

وإل بنيته م الهوا دور ويا دور

لما ينزل راح بينزل باربعه

دنيا بقي ومتسربعه

.......

لما تِبني يابني إبني بالأساس

لما تبني يكون بناك بأساس متين

دنيا فانيه مظفلطه صعبه المراس

لما تبني يابني إبني إيمان ودين

....