قصص وتجارب أمهات فى تربية أبنائهم
انا عندي ولدين تالته جامعه وتانيه ثانوي...جبت ابني الاول وكان عمري 20 سنه كنت اتمني يتربي ذي ماانا اتربيت اتربي علي الهدوء والتعامل السوي وابني فيه كل القيم والاخلاق وكنت انتهز اي مجله او جريده او برنامج تليفزيوني بيتكلم علي تربيه
الاطفال واذاي نتعامل معاهم واذاي نعاقبهم ..بس للاسف في المقابل كان والدهم عكسي تماما في كل حاجه عنيف جدا عصبي جدا مزاجه متقلب دايما اتربي وسط اسره غير سويه والده كان مربيهم تربيه ميري كلها عقد وطرب وعقاب عنيف ....
انا برضه متربيه ميري بس عكس كده خالص اخدنا من الميري الالتزام والانضباط وغرس الاخلاق وبس ....
وبدات المشاكل بينا هو بيربي بلضرب والاهانه والافاظ الغير لائقه.......
وانا طبعا بربي عكسه لاكن هو كان الطرف الاقوي وكان بيهد كل حاجه بعملها ومن وجه نظره انتي بدلعي انتي مش عارفه تربي ........
كان عقابه صعب اوي كان ممكن يقوم الولد من عز نومه علشان يضربه وكان عمره لايتجاوز 3سنوات وكان بيعلقه في اوكره الباب وانا كنت بتخانق معاه ديما واقف قصاده احوش عن ابني وكان بسبب ده بيتطاول عليا انا كمان بكل الاشكال.....
قعدت كذا سنه من غير اطفال قلت خلاص كفايه لان كل الخلافات كانت بتقول ان العشره مش هدوم وان مفيش امان معاه لاكن كنت بخاف من المجتمع وكلام الناس بصراحه كانو الاهل مشجعني على الانفصال ومكنش عاجبهم الوضع
لاكن انا اللي كنت جبانه وخوفت اعمل الخطوه وبعد كذا سنه وبعد الحاح منه وخناقات كتير جبت ابني التاني والحال كما هو عليه واتصعب الامر اكتر واكتر ..... وهو ذي ما هو مفيش تغيير
وانا كنت بحاول مع اولادي وهو مش موجود اشتري قصص وأقرئها ليهم اشترلهم لعب تنمي افكارهم اشتري كتب تلوين وحكايات احفظهم قرآن واحكلهم عن الصحابه ولما كانو يغلطوا كنت اقولهم عاقبوا نفسكم اعمل معاكوا ايه
وكنت اوقات كتير اعمل ورقه والزقها علي الحيطه وكل واحد باسمه اللي يعمل حاجه صح احطله جنيه واللي يعمل غلط اشيل منه الجنيه
واللي يضرب اخوه اخد من رصيده جنيه واديه لاخوه...كنت لما يزعلوني اشيل اللعب بتاعتهم ومخلهمش يلعبوا بيها وكنت امنع عنهم المصروف
ولما يعملوا حاجه صح اجبلهم لعبه او حاجه حلوه بيحبوها كنت بشيل الحاجات الحلوه عندي في البيت واطلعها وقت المكافأة ......
لما كانو يحكولي حاجه صح عملوها في المدرسه كان لازم اجبلهم حاجه بيحبوها واحكي لتيته او جدو او لاي حد بيحبوه انه عمل حاجه صح....
ولما كبرو شويه بدا العنف يبان اكتر لان اللي انا بعمله بيتهد الاب بيدخل البيت يزعق يشتم يضرب يقول الفاظ مش محترمه ومهما اقول مينفعش كده مش قدام العيال برده بيزود وعادي ومبقاش في حدود لاي حاجه وانا كنت بتحمل علشان العيال يتربوا بين امهم وابوهم وميتعقدوش ويبقوا ذي الولاد اللي حواليهم.....والسنين بتمر الاحوال بتزيد سوق لانهم مشاكلهم بتكبر وعقابهم بيكبر .....فكنت بخبي عليه كل حاجه تخص الولاد ميعرفش عنهم حاجه انا اللي كنت بتصرف في كل شيء يخصهم لا مدرسين ولا مدرسه ولامذاكره ولا حتي اما بيكونوا عيانين مقدرش اقول انهم عيانين هيقولي كلام كتير وهيعنفني وشيلني الليله كالعاده كنت بروح معاهم الدروس وارجع معاهم ومكنتش سيباهم لوحده ....
ده كله كان بيحصل لحد مرحله الابتدائيه .......ونجيب المجموع الكبير المحترم. ....وبعد كده تبدا المعاناه الاكبر دخول اعدادي وكان عمهم مدرس معاهم في نفس المدرسه ولهذا السبب كان ممنوع اني ادخل في اي حاجه تخص المدرسه عمهم هيتصرف طبعا ومع ده طبعا الولاد بدأو يتغيرو وكل سنه بتعدي في هذه المرحله كنت بشوف تغير واضح في ولادي بقت كل صغيره وكبيره بباهم علي علم بيها طبعا من عمهم والعقاب بقي مستمر وطبعا علي طريقته المهينه لدرجه انه كان ممكن يقلعهم هدومهم ويطردهم بره الشقه وطبعا انا بدخل علشان ميعملش ده وتتحول الخناقه بيني وبينه ويسمعني الكلام اللي عمره مابسمعه غير منه ونتخاصم بالشهر انا واولادي مع بعض في اوضه واحده وهو مع نفسه
وطبعا مكنش عنده اي حد يرجعه عن اللي بيعمله ولدته واخواته الكلام ده بالنسبه ليهم عادي جدا وهو ده الصح وهو لو اتصرف عكس كده وتهاون معاهم هما اللي يشجعوه علي العقاب السيء لولاده ومن وجه نظرهم دول صبيان ولازم يتشد عليهم .....
وانا طبعا كالعاده بحاول امحي كل حاجه بيعملها معاهم وقولهم ده بيحبكوا وبيخاف عليكوا وعايزكم تبقوا كويسين ومش عايزكم تغلطوا وتتصرفوا صح.....كانوا بيصدقوني وهما صغيرين وكنت فاكره اني انا اللي هكسب المعركه وانهم هيتربوا صح ومن غير عقد .......
لاكن حسبتها غلط كنت فاكره انهم لو اتربوا من غير ابوهم هيبقي الوضع سيء ....لاكن اكتشفت اني كنت بضحك علي نفسي.......
بعد مرور السنين الدنيا ظهرت خااااااالص والولاد بقوا قطعه من ابوهم بقي معايا تلاته نسخه واحده ولاقيت اني لم انجز اي شيء وبقيت بالنسبه لاولادي شخص سلبي ليس له اي اهميه ومش بيسمعوا كلامي خاااااالص وبقوا يتعاملوا معايا ذي بباهم بالظبط مش بقولكم نسخ طبق الاصل
✨✨✨✨✨✨✨✨✨✨✨✨✨✨
😊 نصحتي للمقلبلين علي الزواج ارجوكم خدو وقتكوا متستعجلوش علي الارتباط ادرسوا بعض كويس شوفوا عايزين تربوا ولادكوا اذاي لانهم هيبقوا شبهكم واوعو تفتكروا انكم تقدرو تغيرو بعض ده حلم جميل ومش هيتحقق ارجوكم هاتوا لدنيا اولاد سويه مش معقده ولا تكون ليكم زريه غير صالحه تتعبكوا العمر كله واختاروا شريك حياه تقدرو تعملوا مع بعض بيت سوي غير معاق
😊 نصيحه لكل اب وام ارجوكم اتفقوا ارجوكم احترموا بعض حتي ولو قدام اولادكم كملوا بعض وكونوا قدوه لاولادكم اوعوا تفتكروا انكم هتقدرو تعملوا ملايكه انتم هتعملوا اشخاص نسخه منكم ازرعوا صح علشان تحصدو صح ارموا بذره صالحه واروها صح علشان تعرفوا تقابلوا ربنا يوم القيامه وتكونوا عملتوا اللي عليكم لان كل راع مسؤل عن رعيته 👌
ليست هناك تعليقات:
إرسال تعليق