احبائي ومتابعينى اهلا وسهلا بيكم اليوم هنتكلم عن القشره في الشعر وحلها- عندي قشره في شعري مجنناني 🙆♀️ اخلص منها ازاااااي دي ؟؟؟
ولا يهمك، اذا عرف السبب بطل العجب والحيره وكل حاجه ☺ بينا بقي علي شرح مبسط لموضوع القشره ووصفات طبيعيه بسيطه لحله 👍
اولا جلد راسنا هو جلد زي اي حته في جسمنا له دوره حياه وبيتجدد باستمرار. فالجديد بيطلع و القديم طبيعي بيقع بمعدله العادي. القشره بتظهر لما بيبقي معدل تكوين الجلد الميت ده اعلي من العادي بتاعه، او لما القديم ميقعش من علي فروه الراس ويفضل لازق فيها ويتراكم عليها. دي القشره. تيجي بقي الكائنات الدقيقه اللي عايشه علي فروه راسنا عادي جدا ديه تلاقي جلد ميت ومسام مسدوده ودهون ووليمه كبيره ساعتك فتهيص في الهيصه بقي ويبقي ده الموسم بتاعها تاكل وتتغذي وتتكاثر وتنتشر وتتوغل وده مع الوقت بيؤدي لالتهاب وحكه وهرش وريحه مش لطيفه وبعد فتره من استمرار السيناريو ده بيبدأ الشعر يتعب ويقع بمعدل اعلي من الطبيعي ..
الحل: ١. تطهير الفروه من البكتيريا والحفاظ عليها في معدلاتها المتوازنه ٢.مساعده فروه الراس علي التخلص من القشر القديم المتراكم علي فروه الرأس مع تحفيزها علي التخلص اول بأول من خلايا الجلد الميته بشكل طبيعي. وده نحققه بالاتي:
🌸 منقوع الروزماري او الزعتر او القرنفل او القرفه كمطهرات ومهدئات طبيعيه لفروه الرأس.
🌸 عصير الليمون او خل التفاح مخفف كمطهر ومنظف لفروه الرأس ويقلل افراز الغدد الدهنيه.
🌸 ماسك العسل الابيض بالليمون لتطهير وتنظيف فروه الرأس.
🌸 ماسك العسل بماء الورد مهدئ طبيعي لفروه الرأس الملتهبه وفي نفس الوقت منظف ومضاد بكتيري.
🌸 سكراب الملح لتنظيف وتعقيم فروه الراس من بقايا الجلد الميت . ويفضل يكون ملح بحري طبيعي طبعا.
🌸 طمي البنتونايت منظف وماص للدهون بقوه.
🌸 تدليك فروه الراس يوميا بأطراف الاصابع لتحفيز الدوره الدمويه وعمليه التخلص من الجلد الميت.
🌸 تسريح الشعر وتمرير مشط خشبي باسنان واسعه علي فروه الراس يوميا كنوع من التدليك للمساعده علي التخلص من الجلد الميت اول بأول. خلي بالك لو راسك فيها جروح ، الملح والليمون هيوجعوكي اوي فبلاش منهم دلوقت. يقال ان السبب النفسي وراء قشر الرأس هو ال overthinking او التفكير الكتير بصوره غير متوازنه. فارجعي راقبي نفسك وافكارك وصححي وتوازني حتي تتوازن معكي خلايا جسدك. فانتي القائد وهم مسخرين لطاعتك ⚘⚘
ليست هناك تعليقات:
إرسال تعليق