كان ياما كان ياسادة ياكرام ولا يحلى الكلام الا بذكر النبي عليه الصلاة والسلام....... كان في مرة زمان ولد اسمه سلمان، سلمان كان دايما صوته عالي ويتكلم مع اللي اكبر منه بطريقة مش كويسة، ودايما الناس زعلانه
منه إلا واحد بس من أصحابه في المدرسة إسمه اسلام......
في يوم من الايام اسلام شاف سلمان متضايق وزعلان، سأله: ممكن تقوللي إيه اللي مزعلك؟ رد سلمان وقال :انا محدش بيحبني خالص. رد اسلام وقال :ليه، انت بتزعلهم؟ رد سلمان وقال :لا، بس هما مش بيحبوا طريقتي في الكلام وانا مش بعرف اتكلم الا بالطريقة دي وأغلب اللي حوالينا بيتكلم كده وانا بأقلدهم.... رد اسلام وقال :طيب ممكن نروح مع بعض النهاردة؟ ومش عايزك تكون زعلان....
وافق سلمان، وكان غرض اسلام انه يشوف سلمان ازاي بيتعامل مع الناس.. وهما مروحين ركبوا مع بعض عربيه سلمان وإسلام قعدوا جنب بعض وكان في راجل كبير وتعبان واقف. قام اسلام وقال للراجل الكبير.:اتفضل ياعمو استريح... رد سلمان وقال :لا ده مكانك محدش يقعد جنبي غير صاحبي وبس. اسلام استغرب من الموقف جدا وقال لسلمان :ده راجل كبير ازاي اسيبه واقف وانا مستريح انا لسه صغير هاقدر استحمل لكن عمو باين عليه تعبان...
ياسلمان دي مش رجولة ولا حتى أخلاق الإسلام.... الراجل الكبير زعل وقام وقال لاسلام :شكرا يابني جزاك الله خير الجزاء انا خلاص وصلت اسلام رجع تاني قعد مكانه لكن فهم ليه الناس مش بتحب تتعامل مع سلمان. وصلو عند البيت شافو ست كبيرة معاها حاجات كتير ومش قادرة تشيلها وساكنه في نفس بيت سلمان..
اسلام وقف وشال الشنط معاها وطلب من سلمان يساعد معاه لكنه بردو رفض وقال؛ مليش دعوة بحد هيا تتصرف وسابه وطلع... اسلام بعد ما وصل الست شكرته جدا ودعتله كتير... رجع اسلام لسلمان وقال؛ انا عرفت ليه الناس مش بتحبك ولا بتحب تتعامل معاك، انت بتتكلم مع الناس بطريقة مش كويسة خالص ياسلمان أخلاق الإسلام وأخلاق الرجولة مش بتقول اللي انت بتعمله ده...
سيدنا محمد صلى الله عليه وسلم قال (ليس منا من لم يرحم صغيرنا ويوقر كبيرنا) صدق رسول الله صلى الله عليه وسلم جرب كده تغير معاملتك مع الناس جرب تقف للراجل الكبير أو أي بنت في المواصلات وتقعدهم. جرب تساعد حد محتاج مساعدة. جرب تقول للي أكبر منك حضرتك بدل انت، جرب تقول اتفضل بدل خد، جرب تقول شكرا وتسلم ايدك شوف الناس هتعمل معاك ايه.......
سلمان اقتنع بكلام زميله وقرر يتغير وفعلاً مرة في مرة أصبح محبوب من كل الناس، وكل اللي بيساعدهم بيدعوله وهو كمان أصبح مبسوط جداً وأخلاقه اتغيرت كتير للأحسن طبعا،ومنسيش يشكر صاحبه على النصيحة.... وتوتة توتة خلصت الحدوته واستنونا في حدوتة جديدة مفيدة
حدوته جميله ومفيده واحمد استفاد هو وعبد الرحمن كمان
ردحذفحواديتك حقها تتجمع ف كتيب ويتسمي ب تعاليم القيم والاخلاق 💜💜🌸 حقيقي دة كان كتاب موجود زمان 💜 ربنا ي
ردحذفجميلة ومختصرة علشان الولاد .كان نفسي الاقى حد بيكتب حكايات زى كده.. فى تقدم مستمر ان شاء الله
ردحذف