النفسية محتاجه إيه؟! بقلم د.مروه محمد

مدربة ومرشدة فى علم النفس الإيجابى
 فى مسلسل أبو العروسة...أكرم راح قابل والده (عبد الحميد) فى الجنينة، وحس إنه مضايق لأنه طلع على المعاش ..فسأله مالك يابابا؟...

 ودار حوار طويل أهم حاجه فيه إنه قاله أنا مش فاهم مشاعرى ولاحاسس بإيه : هل أنا مبسوط ولازعلان ولا فرحان ولاإيه؟ أنا حتى مش عارف أتكلم، وقاله لما أبقا أفهم إحساسى هفهمك. السؤال المهم هنا هو: ياترى إيه السبب النفسى اللى خلى عبد الحميد مشاعره متلغبطة من وقت ماعرف إنه هيطلع على المعاش؟
 إحنا أحياناً بيكون جوانا مشاعر وأحاسيس ملغبطة ومش عارفين نعبر عنها وبتحسسنا بعدم إتزان لعدم إدراكنا للسبب...
 المشاعراللى بنحس بيها، والتصرفات اللى بنعملها فى الوقت ده بتكون غالباً راجعه لإفتقادنا لشىء ما أو بمعنى أصح إحتياجنا النفسى لشىء ما مهم بالنسبالنا... لذلك هعرض عليكم قائمة بأهم الإحتياجات النفسية لينا كبشر ،واللى هتكون دليلكم فيما بعد لتفسير بعض مشاعركم وتصرفاتكم اللى مش عارفين لها سبب، وعشان تبقا جرس إنذار يوجهكم لإشباع الإحتياج اللى ناقصكم أو توفير البدائل له حفاظاً على صحتكم النفسية ، ومن هذه الإحتياجات :
 1-إحتياجات فسيولوجية :مثل إحتياجنا للبقاء والتسمك بالحياة ،وهو متمثل فى حاجتنا للشرب وللأكل وللنوم الخ.
 2-إحتياج للإنتماء:مثل الإنتماء لعيلة،لمجتمع معين،لنقابات،لبلد الخ.
 3-إحتياج للحب والتقبل: متمثل فى حب الأخرين وتقبلهم لينا ،وإذا مالم يتم إشباع هذا الإحتياج بنحس بالشعور المعاكس وهو الشعور بالرفض والإهمال وغيرها من المشاعر السلبية.
 4-إحتياج للتقدير والإحترام: فى محيط الأسرة والمجتمع والعمل مثل إحتياجنا وفرحتنا بكلمات الثناء والتشجيع،الألقاب،الشهادات التقديرية .
 5-إحتياج للشوفان: (بمعنى إن إحنا محتاجين نحس من اللى حوالينا.. إن إحنا متشافين ،موجودين،مهمين ووجودنا ليه قيمة، ومعنى، وتأثير على الأخرين).
 6-إحتياج للأمن والأمان: (أمان على النفس ،والممتلكات، والوظيفة الخ ) بمعنى العيش فى بيئة أمنة من المخاطر.
 7-إحتياج للإستقلال الذاتى:مثل إحتياجنا للحرية فى القول ،والفعل، وإستقلالنا عن الأخرين عند إتخاذ أى قرار.
 8-إحتياج للإنجاز:إنجاز أى عمل حتى لو بسيط بيشعرنا بالفرحة، والبهجة ،ويساهم فى زيادة تقديرنا لذاتنا جداً.
 9-إحتياج للرضا والإستمتاع: شكر ربنا على كل النعم ،وشكر الأخرين ، والشعور بالرضا على كل شىء لدينا، بيساعدنا على الإبداع والإنجاز والإستمتاع بحياتنا.
 10-إحتياج للمعنى:إحتياجنا لإيجاد معنى وهدف لحياتنا.
 11-إحتياج للتغيير:بنحتاج للإحساس بالتغيير من وقت لأخر، والتغيير ده بيعطى إحساس بالبهجة والنضارة والصحة والخروج عن الروتين اليومى. 12-إحتياج للنمو الشخصى: وهذا يتحقق ببحث الإنسان وإكتشافه لمواهبه وقدراته.
 13-إحتياج للتفاعل والإحتكاك بالأخرين وتبادل الخبرات.
 14-إحتياج للمعرفة والتعلم، والإستكشاف، وإشباع رغبة الإستطلاع.
 15-إحتياج للإسهام:يتمثل فى العطاء ومساعدة الأخرين. وفى الختام عايزاكم بناء على كلامى السابق ، تفكروا إنتم و تجاوبونى على الأسئلة التاليه : تعتقدوا عبد الحميد كان سبب لغبطة مشاعره إحتياجه لأى نوع من الإحتياجات النفسية اللى ذكرتها؟ وماهو أكثر إحتياج لما قرئتوه لمس نفسيتكم، وحسيتوا إنكم محتاجين تشبعوه؟