حدوتة انا وماما. بقلم. شيماء أبوزيد

 كان ياما كان ياسادة ياكرام ولا يحلى الكلام الا بذكر النبي عليه الصلاة والسلام... كان في مرة زمان بنت جميله إسمها منه....
منه كانت شاطرة جدا فى المدرسة وكل أصحابها بيحبوها لكن كانت
مشكلتها الوحيدة إنها مش بتحب تساعد ماما في البيت....
 تصحى من النوم الصبح تسيب سريرها من غير ما يترتب ومش بتهتم بهدومها ولا بتعمل اي حاجة تساعد بيها مامتها خالص،
في يوم من الايام مامتها كانت تعبانه وطلبت من منه تساعدها في البيت، منه رفضت وقالت :
انا عندي مذاكرة كتير ومش قادرة اعمليها انتي ياماما....
ماما تقولها:كده يامنه، انتي بنت جميلة والمفروض تسمعي كلام ماما حبيبتك وتتكلمي معايا كمان بأسلوب احسن من كده...
 ردت منه وقالت :ياماما انا بحبك لكن مش قادرة اعمل حاجه. مامة منه سكتت وزعلت وبابا عرف إللي حصل وقال لمنه :انتي بنت جميله وشاطرة وبتسمعي الكلام وخصوصاً كلام ربنا سبحانه وتعالى وكلام سيدنا محمد صلى الله عليه وسلم.... منه قالت :
يابابا انا مش فاضية وبارجع من المدرسة تعبانه خالص.. رد بابا وقال : لو انتي ساعدتي ماما ربنا هيساعدك لأنك في الحقيقة مش بس بتسمعي كلام ماما لا وبتسمعي وبتنفذي كلام ربنا كمان. ردت منه وقالت :ازاي يابابا؟!. رد بابا وقال :ربنا سبحانه وتعالى قال في كتابه الكريم بسم الله الرحمن الرحيم (وقضى ربك الا تعبدوا الا إياه وبالوالدين إحسانا) صدق الله العظيم وسيدنا محمد صل الله عليه وسلم
 قال عند سؤال احد الصحابة له :من أحق الناس بحسن صحابتي؟ قال:أمك. قال:ثم من؟ قال أمك. قال :ثم من؟ قال:امك.
 قال :ثم من؟ قال :أبوك... صدق رسول الله صل الله عليه وسلم.
 اتكسفت منه جداً واعتذرت لبابا وماما وقالت لماما سامحيني ياامي انا خلاص هساعدك وعمري ماهتعبك تاني ابدا بعد كده ومن يومها ومنه حتى لو معندهاش وقت وتعبانة....
 تفتكر على طول كلام ربنا سبحانه وتعالى وحديث سيدنا محمد صل الله عليه وسلم وتقوم على طول تساعد ماما وأصبحت اشطر وأجمل بنت في الدنيا وماما وبابا دايما بيدعولها بالنجاح والتوفيق في حياتها...... وتوته توته خلصت الحدوتة واستنونا في حدوتة جديدة مفيدة