كان ياما كان ياسادة ياكرام ولا يحلي الكلام إلا بذكر النبي عليه الصلاة والسلام ......
كان في زمان ولد شاطر اسمه ياسين. في يوم من الأيام ماما كانت عايزه تروح السوبر ماركت تشتري حاجات محتاجاها في البيت . ياسين طلب من
ماما انه يروح معاها ووافقت ماما وقالت :
بس بشرط تمشي معايا من غير شقاوة وتساعدني. وافق ياسين على طول وفرح جداً وجرى لبس وجهز نفسه. ونزل هو وماما وأول ما وصلو السوبر ماركت كل ما ياسين يشوف حاجة يطلبها من ماما وكل شوية يطلب بصوت عالي وماما تقوله :
حبيبي هجيبلك حاجة واحدة بس .وياسين ابدا مش موافق ويعيط ويعلي صوته والناس كلها شايفه الموقف، طبعا ماما زعلت جدا ورجعت عالبيت من غير ماتشتري أي حاجه خالص وكمان زعلانه من ياسين ... لما وصلوا البيت بابا عرف اللي حصل قعد اتكلم مع ياسين وقالله:ياسين ينفع اللي انت عملته ده ؟!!! رد ياسين وقال :
يابابا انا كنت عايز اشترى حاجة حلوة . رد بابا وقال : لكن كان ممكن تطلب بهدوء وبأسلوب احسن من كده ...كده انت خليت ماما زعلانه وكل الناس شافت ياسين وهو بيتصرف تصرف مش صح ،وانا متأكد ان ياسين أشطر واجمل ولد في الدنيا... رد ياسين وقال :
انا آسف يابابا واوعدك آخر مرة هاعمل كده واوعدك أن بعد كده هاتفق مع ماما الأول واسالها اذا كان ينفع ولا لأ اشتري حاجات حلوة ...اعتذر ياسين كمان لماما على التصرف الغلط وماما قبلت الاعتذار وسامحته على طول. وقالتله : ياسين انا مش باحب ازعلك وعايزه اجيبلك كل اللي بتحبه لكن بالعقل وحسب ظروفنا كمان في غيرنا مش لاقيه يشتري أي حاجه خالص. وخلينا نتفق مع بعض أن بعد كده واحنا رايحين السوبر ماركت نشتري حاجه واحدة بس انت عايزها وبتحبها بس تطلب بهدوء بيني وبينك من غير ما أي حد يسمعنا عشان كمان اشوف هيكون معايا فلوس تكفي ولا لأ....... طالما طلبت تنزل معايا يبقى لازم تتحمل المسؤولية كمان معايا وبعدين كمان ماينفعش كل اللي نحتاجه ناخده لو انت محتاجه فعلا يبقى تجمع من مصروفك وتشتريه...... وافق ياسين واعتذر تاني لمامته وطلب منها تسامحه وحضنته حضن كبير جداً ومن يومها وياسين أصبح ولد شاطر وراجل ماما تعتمد عليه في أي مشوار ...... وتوته توته خلصت الحدوته واستنونا في حدوته جديدة مفيدة
ليست هناك تعليقات:
إرسال تعليق