هتقلبوا علينا إمتى ؟ بقلم ليمي سعيد

معلش اصلي من اللي قبلك خدت دروس كتير قوووى وبقيت ممكن ادرس بنفسي كمان في الجامعات المصريه والعربيه والأوروبية مراحل تطور اى علاقه معروفه بإختلاف المدخل ليها صداقه بقا ولا حب ولا شغل ولا زى ما تكون تختلف المسميات والطرق بس النتيجه المتوقعه واحده بعد مده
طالت أو قصرت فالاول مدخل انك افضل شخص في العالم ولو في منك اتنين كان حال البلد اتحول من حال لحال وانت برضه زى ما انت بنفس طباعك وطريقتك الحلوة اللي عجباهم جدا دى بس مع الوقت الفرق أن العلاقه بتبقي أقوى بقا و تحس انك خلاص مستحيل يستغني عنك أو يتغير عليك و تصدق نفسك تماما فجأه والعشم بقا بيزيد و الثقه بتتضاعف و تمشي و في بطنك بطيخه صيفي انك عنده غير اى حد و فجأه وبدون مقدمات تتحول بقدرة قادر لمرحله التلاكيك اللي هو كل اللي بتعمله مش عاجب تقول حلو مش عاجب وحش مش عاجب تسكت برضه مش عاجب وتفضل تعض علي أناملك من الغيظ وتضرب أخماس فأسداس ماله ده ومالها دى مجانين مثلا طيب هما اصلا كانوا كده وانا كنت معمي ومصدق طيب ايه طيب ليه و تفضل فالمرحله الغريبه دى شويه وحسب بقا قوتك شويه كتير ولا قليل لحد ما يطفح بيك الكيل و تقول حرمت انا مش لاعب و تاخد درس حلو فى حياتك بس الجميل بقا أنه بيتكرر كتير قوى لحد ما فيوم بتتغير صح و تصحي تلاقي نفسك اتبدلت من انت الطيب لانت الشرير اللي قلبك مات من كتر ما شاف و تبص فالمرايه تدور علي نفسك القديمه متلقيهاش تلاقيها تاهت وسط علامات الجروح اللي اتجرحتها علي مدار عمرك بس في وسط كل ده بتلاقي ناس الماظ علي مستوى كل العلاقات صامده معاك من الاول للاخر سنين وسنين مستحملين بعض وحابين بعض وصامدين مهما حصل منكم في بعض ساعتها امسك في الناس دى وتبت قوى لأنهم الماظ حر هما دول قوتك فالحياة ربنا يكتر الماظنا الجدعان الناس دول ساندينك ما يهزهم ريح سواء جامده أو ضعيفه قابلينك زى ما انت مش عاوزينك تفصيل هما اللي بيسندوك قبل ما توصل لمرحله التبديل بين الطيب والشرير وبيلحقوك فالوقت المناسب حتى لو مزعلهم بس انت عندهم اغلى من اى زعل اى حاجه غيرك بتبقي بالنسبه لهم صفر ع الشمال مهما كبرت رسالتى للى عارف نفسه وناويها اقلب بدرى مش لازم نضيع وقت طويل احنا ورانا مشاغل كتير اقلبوا بسرعه أو كونوا الماظ الإنتظار مش هيفيد